جموں و کشمیر اپنے وسائل کے باوجود بجلی خریدنے پر مجبور، نائب وزیر اعلیٰ کا اظہارِ تشویش

عظمیٰ ویب ڈیسک
جموں/نائب وزیر اعلیٰ سریندر چودھری نے جمعرات کو این ایچ پی سی لمٹیڈسے آبی بجلی منصوبے واپس لینے کا مطالبہ کرتے ہوئے کہا کہ مقامی آبی وسائل پر کنٹرول جموں و کشمیر کے عوام کے پاس ہونا چاہیے۔صحافیوں سے بات کرتے ہوئے انہوں نے کہا کہ جموں و کشمیر وسیع آبی بجلی صلاحیت رکھنے کے باوجود بجلی خریدنے پر مالی بوجھ اٹھا رہا ہے۔انہوں نے کہاپانی ہمارے وسائل ہیں، سب کچھ ہمارا ہے، پھر بھی ہمیں بجلی خریدنے پر مجبور کیا جا رہا ہے،چودھری نے مقامی منصوبوں پر زیادہ کنٹرول کی ضرورت پر زور دیا۔
یہ بیان ایسے وقت میں سامنے آیا ہے جب جموں و کشمیر میں آبی بجلی منصوبوں کی ملکیت اور فوائد کے حوالے سے سیاسی بحث شدت اختیار کر رہی ہے، خاص طور پر جب نئے منصوبے مرکزی ایجنسیوں کے تحت تیار کیے جا رہے ہیں۔
نائب وزیر اعلیٰ نے کہا کہ اگرچہ عمومی طور پر یہ اتفاق پایا جاتا ہے کہ جموں و کشمیر کو بجلی کی پیداوار میں خود کفیل ہونا چاہیے، تاہم موجودہ نظام اس ہدف کو حاصل کرنے میں ناکام رہا ہے۔انہوں نے مزید کہا، سب کہتے ہیں کہ جموں و کشمیر کو خود کفیل ہونا چاہیے، لیکن بدقسمتی سے ہمارے اپنے منصوبوں کے باوجود ہمیں بجلی خریدنی پڑ رہی ہے۔ اگر آپ دیکھیں کہ ہم کتنی رقم بجلی خریدنے پر خرچ کرتے ہیں تو آپ حیران رہ جائیں گے۔
دریں اثنا، پیپلز ڈیموکریٹک پارٹی (پی ڈی پی) کے رکن اسمبلی وحید الرحمن پرہ نے حکومت کو تنقید کا نشانہ بناتے ہوئے کہا کہ دو آبی بجلی منصوبے این ایچ پی سی کے حوالے کیے گئے ہیں۔انہوں نے کہا کہ 240 میگاواٹ Uri-I اسٹیج II اور 260 میگاواٹ Dulhasti اسٹیج II منصوبے، جن کی مجموعی پیداواری صلاحیت 500 میگاواٹ ہے، این ایچ پی سی کو منتقل کیے گئے ہیں، جس سے مقامی فوائد اور طویل مدتی کنٹرول پر خدشات پیدا ہو گئے ہیں۔پرا نے پاور شیئرنگ کے نظام اور جموں و کشمیر کی توانائی خود مختاری پر اس کے وسیع اثرات پر بھی سوال اٹھائے۔