وزیر اعظم نریندر مودی کی ’پنچ پران‘ سے متاثر قومی تحریک ساورکر کے وژن اور خوابوں کو پورا کریگی:ایل جی سنہا
عظمیٰ نیوزسروس
جموں//”مادر ہند کے بہادر بیٹے ساورکر نے بے پناہ مشکلات برداشت کیں لیکن ان کی زندگی کا ہر لمحہ اس مٹی کی آزادی اور ترقی کے لیے وقف تھا۔ آج ہندوستان کے لوگ ویر ساورکر کے وژن کے مطابق، ایک مضبوط، آتم نربھر اور وکشت بھارت بنانے کے لیے کام کر رہے ہیں‘‘۔ان باتوںکا اظہارلیفٹیننٹ گورنر منوج سنہا نے نئی دہلی میں ہائی رینج رورل ڈیولپمنٹ سوسائٹی (ایچ آر ڈی ایس انڈیا) کے زیر اہتمام ‘ویر ساورکر انٹرنیشنل امپیکٹ ایوارڈ‘ سے خطاب کر تے ہوئے کیا۔اپنے خطاب میں، لیفٹیننٹ گورنر نے ایچ آر ڈی ایس انڈیا کے غیر معمولی اقدام کی ستائش کی تاکہ دنیا کو مادر وطن کے لیے ساورکر کی بے مثال شراکت کے بارے میں یاد دلایا جائے اور شہریوں کے اجتماعی شعور میں ان کی میراث کو بحال کیا جائے۔ویر ساورکر کو خراج عقیدت پیش کرتے ہوئے، لیفٹیننٹ گورنر نے ہندوستان کی جدوجہد آزادی میں ان کی زندگی بھر کی مہمات اور بے مثال تعاون کو یاد کیا۔اُنکاکہناتھا’’ساورکر ہندوستان کی کامیابی، ہندوستان کی طاقت، ہندوستان کی خوشحالی، ہندوستان کے عزم، ہندوستان کی لگن، ہندوستان کی حساسیت، ہندوستان کی سادگی، ہندوستان کی استقامت، ہندوستان کی ثقافت، اور ہندوستان کے خوابوں کی علامت ہیں۔ ساورکر کے لئے ہندوستان کبھی بھی محض زمین کا ٹکڑا نہیں تھا، بلکہ تہذیب کا مرکز تھا‘‘۔لیفٹیننٹ گورنر نے کہا کہ وزیر اعظم نریندر مودی کی ’پنچ پران‘ سے متاثر قومی تحریک ساورکر کے وژن اور خوابوں کو پورا کرے گی۔انہوں نے تاریخی سچائی اور قومی وقار کے تحفظ کے لیے جھوٹے بیانیے کا مقابلہ کرنے پر بھی زور دیا۔لیفٹیننٹ گورنر نے تمام ایوارڈ جیتنے والوں کو ان کی غیر معمولی لگن اور معاشرے اور قوم کی تعمیر میں شراکت کے لیے مبارکباد دی۔ انہوں نے ان پر زور دیا کہ وہ انسانیت کی امن، ترقی اور خوشحالی کی طرف رہنمائی کے لیے روشنی بنیں۔لیفٹیننٹ گورنر نے کہا، ’’ویر ساورکر انٹرنیشنل امپیکٹ ایوارڈ یہ پیغام دیتا ہے کہ ہندوستان کی قدیم شان کو دوبارہ حاصل کرنے اور 2047 کے وِکست بھارت کے ہدف کو حاصل کرنے کے لیے خود کو وقف کرنے کا وقت آگیا ہے‘‘۔
