ڈویژنل کمشنر اور آئی جی پی کا بھگوتی نگر، توی ریور فرنٹ اور ریلوےسٹیشن پر انتظامات کا معائنہ
عظمیٰ نیوزسروس
جموں//ڈویژنل کمشنر جموں رمیش کمار اور انسپکٹر جنرل آف پولیس جموں بھیم سین توتی نے بھگوتی نگر یاتری نواس میں محکمہ جات کے سربراہان اور نامزد نوڈل افسران کے ساتھ ایک اہم جائزہ اجلاس کی صدارت کی، جس میں سالانہ امرناتھ یاترا 2026 کے لیے کیے جا رہے انتظامات اور تیاریوں کا تفصیلی جائزہ لیا گیا۔ڈویژنل کمشنر نے مختلف محکموں کی جانب سے بھگوتی نگر یاتری نواس میں یاتریوں کے لیے آرام دہ اور سہل قیام کو یقینی بنانے کے سلسلے میں جاری تیاریوں اور ترقیاتی کاموں کا جائزہ لیا۔ یہ سہولیات یاتریوں کے بالتل اور پہلگام بیس کیمپوں کی جانب روانگی سے قبل فراہم کی جا رہی ہیں۔انہوں نے مرمت اور تزئین و آرائش کے ان کاموں کا بھی جائزہ لیا جنہیں 15 جون تک مکمل کرنے کا ہدف مقرر کیا گیا ہے۔ ڈویژنل کمشنر نے متعلقہ محکموں کو ہدایت دی کہ اضافی واٹر کولرز، بیک اپ جنریٹر سیٹس، جرمن ہینگرز اور لنگر علاقوں میں پانی کے نل نصب کیے جائیں۔انہوں نے کلاک روم کی سہولیات میں توسیع، صفائی ستھرائی اور روشنی کے بہتر انتظامات کو یقینی بنانے کی بھی ہدایت دی، جبکہ بیس کیمپ میں ڈاکٹروں، ایمبولینسوں اور ادویات کے وافر ذخیرے کی دستیابی پر بھی زور دیا۔ سیکورٹی اہلکاروں کی رہائش کے انتظامات کا بھی جائزہ لیا گیا۔رمیش کمار نے متعلقہ محکموں کے افسران کے لیے ایک ڈیوٹی روسٹر تیار کرنے کی بھی ہدایت دی تاکہ یاتری نواس کنٹرول روم میں ہر وقت ذمہ دار افسران موجود رہیں اور ضرورت پڑنے پر فوری خدمات فراہم کی جا سکیں۔اجلاس میں بتایا گیا کہ اس سال موقع پر رجسٹریشن (آن دی اسپاٹ رجسٹریشن) اور آر ایف آئی ڈی کے لیے ٹوکن سینٹر توی ریور فرنٹ پر قائم کیا جائے گا، جس سے ریلوے اسٹیشن پر ٹریفک اور ہجوم کے مسائل میں کمی آئے گی۔رجسٹریشن کے عمل کو آسان اور منظم بنانے کے لیے ڈویژنل کمشنر نے توی ریور فرنٹ پر پینے کے پانی، جرمن ہینگرز، قطاروں کے نظم و نسق کے لیے بیریکیڈنگ اور بیت الخلاء کی مناسب سہولیات فراہم کرنے کی ہدایت دی۔ انہوں نے یاتریوں کی آمد و رفت کے لیے توی ریور فرنٹ اور بھگوتی نگر یاتری نواس کے درمیان گاڑیوں کی فراہمی کا بھی حکم دیا۔اس کے علاوہ یاتریوں کی رہنمائی کے لیے جموں شہر اور اس کے اطراف کے سیاحتی مقامات تک فاصلے اور سمت کی معلومات فراہم کرنے والے ڈسپلے بورڈز اور سائن ایجز نصب کرنے کی ہدایت دی گئی۔ سیاحتی مقامات کی سیر کے خواہشمند یاتریوں کے لیے مخصوص راستوں پر فی گھنٹہ بس سروس فراہم کرنے کا بھی منصوبہ بنایا جا رہا ہے۔آئی جی پی جموں بھیم سین توتی نے متعلقہ افسران کو نیم فوجی دستوں کی کمپنیوں کے لیے مناسب انتظامات یقینی بنانے کی ہدایت دی۔ انہوں نے یاترا کے پُرامن اور کامیاب انعقاد کے لیے سیکورٹی فورسز اور سول انتظامیہ کے درمیان مکمل تال میل اور رابطے پر زور دیا۔بعد ازاں ڈویژنل کمشنر اور آئی جی پی نے توی ریور فرنٹ اور ریلوے اسٹیشن کا دورہ کیا اور زمینی سطح پر تیاریوں کا جائزہ لیا۔ اس موقع پر ڈویژنل کمشنر نے ڈائریکٹر ہیلتھ سروسز کو توی ریور فرنٹ پر پانچ بستروں پر مشتمل طبی مرکز قائم کرنے کی ہدایت دی۔انہوں نے یاتریوں کو لانے والی گاڑیوں کی پارکنگ کے لیے جامع منصوبہ تیار کرنے اور توی ریور فرنٹ ٹوکن سینٹر کے لیے الگ نوڈل افسر مقرر کرنے کی بھی ہدایت دی۔اجلاس اور دورے کے دوران ٹریفک نظم و نسق کے لیے ایک جامع منصوبہ مرتب کرنے اور امرناتھ یاترا 2026 کے دوران پورے جموں شہر کو خوبصورت اور دلکش انداز میں سجانے کے احکامات بھی جاری کیے گئے تاکہ شہر کو ایک پُررونق اور تہوار جیسی شکل دی جا سکے۔
امرناتھ یاترا سے قبل ڈی آئی جی شیو کمار شرما کی سیکورٹی جائزہ میٹنگ
عظمیٰ نیوز سروس
جموں//آئندہ امرناتھ یاتراکے لیے سیکورٹی انتظامات کا جائزہ لینے کی غرض سے ڈی آئی جی ادھم پور-ریاسی رینج شیو کمار شرما نے رینج پولیس ہیڈکوارٹر ادھم پور میں ایک جامع مشترکہ سیکورٹی جائزہ اجلاس منعقد کیا۔ایس ایس پی ادھم پور نے امرناتھ یاتراکے لیے سیکورٹی انتظامات، نگرانی کے اقدامات، قافلوں کے نظم و نسق، کوئیک رسپانس ٹیموں کی تعیناتی اور ہنگامی ردعمل کے منصوبوں پر ایک تفصیلی پریزنٹیشن پیش کی۔اجلاس سے خطاب کرتے ہوئے ڈی آئی جی شیو کمار شرما نے یاترا کے دوران زیادہ سے زیادہ چوکسی، سیکورٹی پروٹوکول پر سختی سے عمل درآمد اور یاتری دوست رویہ اختیار کرنے پر زور دیا۔انہوں نے ایس ایس پی ادھم پور کو ہدایت دی کہ لنگروں، قیام گاہوں اور یاترا سے متعلق دیگر سہولیات کا باقاعدہ معائنہ کیا جائے اور مشتبہ نقل و حرکت اور ملک دشمن عناصر پر کڑی نظر رکھی جائے تاکہ سیکورٹی انتظامات مزید مضبوط بنائے جا سکیں۔اجلاس میں موجود افسران کو ہدایت دی گئی کہ انٹیلی جنس معلومات کے حصول میں مزید تیزی لائی جائے، قابلِ عمل اطلاعات بروقت شیئر کی جائیں اور انٹیلی جنس ایجنسیوں سمیت دیگر متعلقہ اداروں کے ساتھ قریبی رابطہ برقرار رکھا جائے تاکہ ایک مضبوط اور فعال سیکورٹی نظام یقینی بنایا جا سکے۔ڈی آئی جی نے ڈرون نگرانی میں اضافہ، حساس مقامات اور یاترا راستوں پر اینٹی سبوتاژ چیکنگ کے لیے ڈاگ اسکواڈز کی تعیناتی اور کوئیک رسپانس ٹیموں کی مکمل عملی تیاری پر زور دیا۔ انہوں نے پولیس، مرکزی نیم فوجی دستوں ،سول انتظامیہ، ٹریفک پولیس، محکمہ صحت اور دیگر متعلقہ محکموں کے درمیان مؤثر رابطہ اور ہم آہنگی کی ضرورت پر بھی زور دیا تاکہ معلومات کے فوری تبادلے، مشترکہ تیاری اور کسی بھی ہنگامی صورتحال سے مؤثر انداز میں نمٹا جا سکے۔پروجیکٹ ڈائریکٹر این ایچ اے آئی ادھم پور کو ہدایت دی گئی کہ قومی شاہراہ کی مناسب دیکھ بھال اور مرمت کو یقینی بنایا جائے اور حساس مقامات پر افرادی قوت، مشینری اور ہنگامی بحالی کا سامان پیشگی طور پر دستیاب رکھا جائے تاکہ کسی بھی ناخوشگوار صورتحال کی صورت میں ٹریفک کی فوری بحالی ممکن بنائی جا سکے۔اجلاس میں قومی شاہراہ اور یاترا کے راستوں کی چوبیس گھنٹے نگرانی، ناکہ چیکنگ اور گشت کو مزید مؤثر بنانے پر خصوصی زور دیا گیا۔ افسران کو ہدایت دی گئی کہ یاترا کے چھوٹے قافلوں کی سیکورٹی اور انتظامات کو یقینی بنایا جائے، کرایہ داروں کی تصدیق اور مردم شماری مہم کو تیز کیا جائے اور تمام اہم یاترا مقامات پر سی سی ٹی وی نگرانی کے نظام کو مزید وسعت دی جائے، جس کی چوبیس گھنٹے مانیٹرنگ کی جائے۔
