عظمیٰ ویب ڈیسک
جموں/سوشل میڈیا پر سرمائی تعطیلات میں ممکنہ توسیع سے متعلق پھیلنے والی قیاس آرائیوں کے درمیان حکام نے ہفتہ کے روز واضح کیا کہ جموں کے سمر زون میں تمام سرکاری و نجی اسکول مقررہ شیڈول کے مطابق 12 جنوری سے دوبارہ کھلیں گے، اور تعطیلات میں کسی قسم کی مزید توسیع نہیں کی جا رہی ہے۔حکام کے مطابق تدریسی عملہ پہلے ہی اپنی ڈیوٹیاں دوبارہ سنبھال چکا ہے اور انہیں ہفتہ کے روز اسکولوں میں حاضری دینے کی ہدایت دی گئی تھی۔ انہوں نے تصدیق کی کہ اساتذہ اپنی اپنی تعلیمی اداروں میں موجود ہیں، جبکہ طلبہ سے کہا گیا ہے کہ وہ تعلیمی کیلنڈر کے مطابق 12 جنوری سے کلاسوں میں شرکت کریں۔
یہ وضاحت اُن غیر مصدقہ خبروں کے بعد سامنے آئی جو سوشل میڈیا پر گردش کر رہی تھیں اور جن میں موسم کی صورتحال کے پیش نظر جموں میں موسمِ سرما کی تعطیلات میں توسیع کا دعویٰ کیا جا رہا تھا۔ حکام نے ان دعوؤں کو بے بنیاد قرار دیتے ہوئے والدین اور طلبہ کو غیر سرکاری معلومات پر بھروسہ نہ کرنے کی ہدایت کی۔
حکام نے بتایا کہ سمر زون کے سرکاری و نجی اسکولوں میں تعلیمی سرگرمیوں کی بحالی کو یقینی بنانے کے لیے تمام ضروری انتظامات مکمل کر لیے گئے ہیں۔ اسکول انتظامیہ کو بھی ہدایت دی گئی ہے کہ جاری کردہ شیڈول پر سختی سے عمل کریں اور طلبہ کی واپسی کے بعد باقاعدہ تدریسی عمل کو یقینی بنائیں۔
محکمہ تعلیم کے حکام نے ایک بار پھر واضح کیا کہ تعطیلات یا تعلیمی کیلنڈر میں کسی بھی تبدیلی سے متعلق فیصلے صرف سرکاری ذرائع سے ہی جاری کیے جائیں گے، اور عوام سے اپیل کی کہ افواہوں پر کان دھرنے سے گریز کریں۔اس وضاحت کے ساتھ ہی جموں کے سمر زون میں موسمِ سرما کی تعطیلات باضابطہ طور پرآج یعنی 10 جنوری کو ختم ہو جائیں گی، جبکہ طلبہ کے لیے معمول کی کلاسیں 12 جنوری سے دوبارہ شروع ہوں گی۔
سرمائی تعطیلات میں توسیع نہیں، 12جنوری سے دوبارہ کھلیں گے جموں سمر زون کے اسکول
ملک و جہان کی خبروں سے رہیں اپڈیٹ
نیوز لیڑ ای میل پر پائیں
