مَالِکِ یَوْمِ الدِّیْن
دیکھ رہا ہوں حدِّ نظر تک رات بڑی سنگین
مَالِکِ یَوْمِ الدِّیْن
تُو چاہے تو کر سکتا ہے صبح مِری رنگین
مَالِکِ یَوْمِ الدِّیْن !
اِس کونے سے اُس کونے تک سر پر جنگ منڈلائے
چین کوئی نہ پائے
ایٹم بَم کے بھونچالوں سے کانپ رہی ہے زمین
مَالِکِ یَوْمِ الدِّیْن !
وحشت ننگی ناچ رہی ہے لڑتے ہیں شیطان
مَرتے ہیں انسان
دیکھ نہ کھووے انسانیّت اپنا حسنِ یقین
مَالِکِ یَوْمِ الدِّیْن !
زرد ہے رُوئے ابنِ آدم اس کو چنبیلی رنگت دے
کھلنے والی صورت دے
مُرجھائی کلیوں کے ہمدم، خوشبوؤں کے اَمین
مَالِکِ یَوْمِ الدِّیْن !
ہم جنگلی تہذیب کے پالے کھا کر ہوش کے دانے
ہوگئے ہیں مستانے
خون بہا کر دیکھ رہے ہیں کتنا کون ذہین
مَالِکِ یَوْمِ الدِّیْن !
جذبِ بقائے باہم سے حُبِّ انسانی پیدا کر
چہرے نوارنی پیدا کر
فتنے اُٹھاتے ہیں دھرتی پر بس دو چار کمین
مَالِکِ یَوْمِ الدِّیْن !
جوشِ اُخوت، سُوزِ محبت، عشقِ نہایت ہم کو دے
اُنس و عنایت ہم کو دے
امن و رواداری کی دولت سب سے بڑھ کر حسین
مَالِکِ یَوْمِ الدِّیْن !
سکھ اور چین کی راہ بتا دے اے مولائے کریم
رَبِّ عرشِ عظیم
ہم جو سکوں سے مل کے رہیں تو چاند سے اچھی زمین
مَالِکِ یَوْمِ الدِّیْن !
گِریاں ہے پیغامِ محمدؐ، عیسیٰؑ کے الفاظ خموش
مست ہیں جنگ فروش
نانک، گوتم، امن و اہنسا دھری ہے ہر تلقین
مَالِکِ یَوْمِ الدِّیْن !
تو چاہے تو بجھ سکتے ہیں خونیں جنگ کے شعلے
امن کی جے جے بولے
سرد پڑیں یہ توپ کے گولے، ٹوٹے ہر سنگین
مَالِکِ یَوْمِ الدِّیْن !
توڈ دے سب ملکوں کی سرحد، کر دے پورب پچھم ایک
بن جائیں ہم نیک
نسل و وطن کا بھید مٹے تو ہم ہیں تیرے رہین
مَالِکِ یَوْمِ الدِّیْن !
دیر نہیں کر بھاؤ گِرا دے ظلم کی ہاہا کاری کا
دام چڑھے خود داری کا
خون بہت میٹھا ہے لیکن آنسو ہیں نمکین
مَالِکِ یَوْمِ الدِّیْن !
ف۔س۔اعجاز
کلکتہ،
موبائل نمبر؛ 9830483810
لیلۃ القدر
لیلۃ القدر اک قیمتی رات ہے
ابر رحمت سے یکسر سجی رات ہے
اس میں نازل کلام الٰہی ہوا
اس لئے سب سے اچھی، بھلی رات ہے
مانگ لو رب سے دل کی دعا مانگ لو
کتنی دلکش ، حسیں ، چاندنی رات ہے
ہے ہزاروں برس سے بھی بہتر یہ شب
رحمتوں ، برکتوں سے بھری رات ہے
طاق راتوں میں کر اِس کو صادق تلاش
ساری دنیا میں یہ جاگتی رات ہے
محمد صادق طاہر قاسمی ندوی
خلیل آباد ضلع سنت کبیر نگر مشرقی یوپی
موبائل نمبر؛8957186735
