موبائل پر بات کرنی مہنگی پڑی

جموں //قانون ساز اسمبلی میں ایک آفیسر کو اُس وقت فون پر بات کرنی مہنگی پڑی جب اُسے پورے ایوان کے سامنے ڈپٹی اسپیکر نے گیلری سے باہر کر دیا ۔قانون ساز اسمبلی میں محکمہ بازآبادکاری کے مطالبات زر پر ممبر اسمبلی شمیمہ فردوس نے بحث میں حصہ لیا تھا تو اسی دوران اسمبلی کے ڈپٹی اسپیکر نذیر احمد گریزی کی نظر افسر گیلری پرپڑی جہاں ایک آفیسر موبائیل فون پر بات کر رہا تھا۔ڈپٹی اسپیکر نے سخت جذباتی انداز میں افسر کو باہر کر دیا اور اسمبلی عملہ کو ہدایت دی کہ اس افسر کو گیلری سے باہر کیا جائے ۔انہوں نے کہا ’ ایسے فون کرتے ہیں جیسے گھر میں بیٹھے ہیں‘ ۔انہوں نے اس دوران ایوان میں موجود ممبران اور وزیر کے علاوہ افسران سے کہا کہ ہم سب کو ہاوس کے تقدس کا خیال دل سے رکھنا چاہئے ۔