دھان کی خریداری

جموں //ڈائریکٹر زراعت جموں کے کے شرما نے منگل کو فوڈ کارپوریشن آف انڈیا (ایف سی آئی) اور منڈی کے مزدوروںاور ٹھیکیداروں کے ساتھ میٹنگ میں جموں ، کٹھوعہ اور سانبہ اضلاع میں دھان کی خریداری مراکز (منڈیوں) کے کام کاج کا جائزہ لیا۔اس موقع پر جوائنٹ ڈائریکٹر (مارکیٹنگ )سمیت دیگر اعلیٰ افسران بھی موجود تھے ۔ڈائریکٹر زراعت نے بتایا کہ جموں ، کٹھوعہ اور سانبہ میں 20 دھان خریداری مراکز کو فعال بنایا گیا ہے ،تاکہ کسانوں کوخرید وفروخت کے دوران کسی قسم کی پریشانی نہ ہو ۔انہوں نے کہا کہ اس سال خریداری مراکز کو مکمل طور پر ڈیجیٹلائز کیا گیا ہے جس میں مینڈیز کو ای پروکیورمنٹ پورٹل کے ساتھ انضمام کیا گیا ہے جو خاص طور پر جموں و کشمیر کے یو ٹی کے لیے تیار کیا گیا ہے۔انہوں نے کہا کہ ابھی تک 1000 سے زائد کسان پہلے ہی پورٹل پر رجسٹرڈ ہو چکے ہیں۔ انہوں نے مزید کہا کہ خریداری کے عمل کو ڈیجیٹل کرنے سے کسانوں کی پیداوار کی خریداری میں زیادہ شفافیت کو فروغ ملے گا اور 72 گھنٹوں کے اندر ایم ایس پی کے مطابق براہ راست ان کے بینک کھاتوں میں ادائیگی کو یقینی بنایا جائے گا۔ڈائریکٹر نے شرکاء سے منڈیوں کے ہموار کام کرنے اور کسانوں سے ان کی پیداوار کے لیے یکساں صفائی کے اخراجات کے حوالے سے تجاویز طلب کیں۔ انہوں نے متعلقہ افسران کو یہ بھی ہدایت دی کہ ان تمام دھان خریداری مراکز میں ہر قسم کے بنیادی ڈھانچے اور لاجسٹک سپورٹ کو یقینی بنایا جائے۔