ُادھم پور میں منعقدہ اعزازی تقریب میں شمالی کمان کے سربراہ کی جانب سے فوجیوں کی خدمات کو خراج تحسین

عظمیٰ ویب ڈیسک
ادھم پور/شمالی کمان کے فوجی کمانڈر لیفٹیننٹ جنرل پرتیک شرما نے ہفتہ کے روز فوجیوں کی پیشہ ورانہ مہارت، لگن اور مشکل و چیلنجنگ حالات میں بھی اپنے فرائض کے تئیں غیر متزلزل وفاداری کی بھرپور ستائش کی۔لیفٹیننٹ جنرل شرما نے اُدھم پور میں شمالی کمان ہیڈکوارٹر کے زیر انتظام منعقدہ اعزازی تقریب سے خطاب کرتے ہوئے جوانوں پر زور دیا کہ وہ آپریشنل کے اعلیٰ ترین معیار کو برقرار رکھیں اور ہندوستانی فوج کی روایات و اقدار کو قائم رکھیں۔
اس موقع پر جنرل آفیسر کمانڈنگ اِن چیف نے انعام یافتگان کے اہل خانہ کو بھی مبارکباد پیش کی اور ان کے تعاون اور قربانیوں کو سراہا۔تقریب کے دوران مجموعی طور پر 93 اعزازات عطا کیے گئے جن میں 52 انفرادی ایوارڈز اور 41 اعزازی اسناد شامل تھیں۔ یہ اعزازات غیر معمولی بہادری، نمایاں خدمات اور فرض شناسی کے لیے دیے گئے۔
انفرادی اعزازات میں چار یدھ سیوا میڈل، ایک سینا میڈل (بار)، 37 سینا میڈل، ایک وشِشٹ سیوا میڈل (بار)، آٹھ وشِشٹ سیوا میڈل اور ایک جیون رکشا میڈل (بعد از مرگ) شامل تھے۔اس تقریب میں حاضر سروس فوجی افسران، انعام یافتگان اور ان کے اہل خانہ شریک ہوئے جس نے فوجی خدمات کے دوران ان کی نمایاں کامیابیوں پر اجتماعی فخر اور احترام کا مظاہرہ کیا۔
یہ تقریب ہندوستانی فوج کی بنیادی اقدار بہادری، عزم اور وطن کے لیے بے لوث خدمت کی ایک بار پھر توثیق تھی اور قومی سلامتی کے تحفظ میں اس کے اہلکاروں اور یونٹس کی مثالی خدمات کی یاد دہانی بھی۔