لیفٹیننٹ گورنر منوج سنہا کا پانتھہ چوک میں امرناتھ یاترا تیاریوں کا جائزہ، کام بروقت مکمل کرنے کی ہدایت

عظمیٰ ویب ڈیسک
سری نگر/جموں و کشمیر کے لیفٹیننٹ گورنر منوج سنہا نے پیر کے روز پانتھہ چوک میں شری امرناتھ شرائن بورڈ کے یاتری نواس کا دورہ کرکے جاری تعمیراتی کاموں اور یاتریوں کے لیے کی جانے والی تیاریوں کا موقع پر جائزہ لیا۔
دورے کے دوران لیفٹیننٹ گورنر نے سالانہ امرناتھ یاترا سے قبل عقیدت مندوں کے لیے تیار کی جا رہی بنیادی سہولیات اور انفراسٹرکچر کی پیش رفت کا تفصیلی معائنہ کیا۔
انہوں نے متعلقہ حکام کو ہدایت دی کہ زیر التوا کاموں میں تیزی لائی جائے اور انہیں مقررہ مدت کے اندر مکمل کیا جائے تاکہ یاترا کے آغاز سے قبل تمام ضروری سہولیات یاتریوں کو دستیاب ہوں۔
لیفٹیننٹ گورنر نے اس بات پر بھی زور دیا کہ تعمیراتی کاموں میں معیار کو یقینی بنایا جائے اور یاتریوں کی سہولت اور حفاظت کے لیے تمام انتظامات کو مؤثر اور ہموار بنایا جائے۔