آئی جی پی کشمیر کا پروبیشنری ڈی ایس پیز سے خطاب، پیشہ ورانہ مہارت اور عوامی رابطے پر زور

عظمیٰ ویب ڈیسک
سرینگر/انسپکٹر جنرل آف پولیس (آئی جی پی) کشمیر زون وی کے بردی نے جمعہ کے روز 2024 بیچ کے 29 پروبیشنری ڈپٹی سپرنٹنڈنٹ آف پولیس (ڈی ایس پی) سے ایک تعارفی و تربیتی نشست کے دوران خطاب کیا، جو کشمیر زون کے مختلف اضلاع میں عملی تربیت حاصل کر رہے ہیں۔ یہ پروگرام پولیس کنٹرول روم کشمیر میں منعقد ہوا، جس میں ڈی آئی جی سینٹرل کشمیر رینج، ایس ایس پی پی سی آر کشمیر، آئی جی پی کشمیر کے اسٹاف آفیسر اور دیگر سینئر افسران نے شرکت کی۔
اس موقع پر آئی جی پی کشمیر نے پروبیشنری ڈی ایس پیز کے کردار اور ذمہ داریوں پر روشنی ڈالتے ہوئے کہا کہ آپریشنز، تفتیش، امن و قانون کی صورتحال اور انتظامی نگرانی میں ان کا کلیدی کردار ہے۔ انہوں نے ابتدائی سروس کے دوران درست فیصلہ سازی، قیادت اور سیکھنے کے عمل کی اہمیت پر زور دیا۔
آئی جی پی نے خصوصی قوانین جیسے یو اے پی اے اور این ڈی پی ایس ایکٹ کے تحت پیشہ ورانہ، جامع اور نتیجہ خیز تفتیش کی ضرورت پر زور دیتے ہوئے کہا کہ تمام قانونی اور ضابطہ جاتی تقاضوں کی مکمل پابندی ہونی چاہیے۔انہوں نے افسران کو مشورہ دیا کہ وہ تفتیشی اور آپریشنل مہارتیں حاصل کریں، فوجداری قوانین اور طریقۂ کار کا گہرا علم رکھیں اور انفارمیشن ٹیکنالوجی کا مؤثر استعمال کریں۔ اس کے ساتھ ساتھ پولیس قوانین، اسٹینڈنگ آرڈرز اور درست دستاویزات، بشمول ایف آئی آر کی تیاری، درخواستوں، عدالتی فیصلوں، پولیس اسٹیشن مینجمنٹ اور رجسٹرز کی دیکھ بھال کی اہمیت پر بھی زور دیا۔
پیشہ ورانہ طرزِ عمل، نظم و ضبط، ماتحت عملے کی نگرانی، وردی کی درست حالت اور اخلاقی رویے کو بھی نہایت اہم قرار دیا گیا۔ افسران کو باہمی روابط کی صلاحیتیں، انکساری اور اخلاقی اقدار اپنانے اور اپنی پیشہ ورانہ قابلیت میں اضافے کے لیے بیئر ایکٹس، مینولز اور سرکاری ہدایات سے رجوع کرنے کی تلقین کی گئی۔آئی جی پی کشمیر نے عوامی رابطے کی اہمیت کو اجاگر کرتے ہوئے کہا کہ افسران مسائل کے حل پر مبنی رویہ اپنائیں، ہمدردی اور سختی میں توازن رکھیں اور سوشل میڈیا کے ذمہ دارانہ استعمال کو یقینی بنائیں۔پروگرام کے اختتام پر پروبیشنری افسران نے جموں و کشمیر پولیس کی اقدار اور روایات کو برقرار رکھتے ہوئے دیانت داری، ذمہ داری اور لگن کے ساتھ عوامی خدمت کے عزم کا اعادہ کیا۔