بارہمولہ میں سب سے زیادہ بارش، کشمیر میں درمیانی سے شدید بارش

عظمیٰ ویب ڈیسک
سری نگر/جموں کشمیر کے مختلف علاقوں میں گزشتہ 24 گھنٹے کے دوران درمیانی سے شدید بارش اور گرج چمک کے ساتھ بوندا باندی ریکارڈ کی گئی۔محکمہ موسمیات کے مطابق کشمیر کے بالائی علاقوں میں ہلکی برفباری بھی ہوئی، جس کے باعث سری نگر- لیہ شاہراہ ٹریفک کے لیے بند کر دی گئی۔اعداد و شمار کے مطابق سب سے زیادہ بارش بارہمولہ میں 73.0 ملی میٹر ریکارڈ کی گئی، جبکہ پونچھ میں 68.5 ملی میٹر اور راجوری میں 52.0 ملی میٹر بارش ہوئی۔ کشمیر ڈویژن کے اندر، سری نگر میں 31.6 ملی میٹر بارش ہوئی، جب کہ قاضی گنڈ (48.6 ملی میٹر)، پہلگام (36.8 ملی میٹر)، کپواڑہ (40.8 ملی میٹر)، اور کوکرناگ (35.5 ملی میٹر) سمیت دیگر اسٹیشنوں پر بھی درمیانی بارش ریکارڈ کی گئی۔
کشمیر ڈویژن میں، کئی مقامات پر کم از کم درجہ حرارت معمول سے 01 ڈگری سیلسیس زیادہ رہا، جب کہ جموں ڈویژن میں، کئی مقامات پر کم از کم درجہ حرارت معمول سے 13ڈگری سیلسیس کم رہا۔ کشمیر ڈویژن میں سب سے کم کم سے کم درجہ حرارت گلمرگ میں -0.7 ڈگری سینٹی گریڈ ریکارڈ کیا گیا، جب کہ جموں ڈویژن میں سب سے کم درجہ حرارت بھدیرواہ میں 8.2 ڈگری سینٹی گریڈ ریکارڈ کیا گیا۔
محکمہ موسمیات کے مطابق جموں و کشمیر میں 10 اپریل تک موسم غیر یقینی رہنے کا امکان ہے۔ اگلے چند دنوں کے لیے بارش اور برف باری کے وقفے وقفے سے جاری رہنے کی پیش گوئی کی گئی ہے۔31 مارچ سے 2 اپریل تک دوپہر کے بعد کہیں کہیں ہلکی بارش یا برف باری متوقع ہے، جبکہ 3 اور 4 اپریل کو عمومی طور پر ابر آلود موسم کے ساتھ کئی علاقوں میں معتدل بارش، برف باری، گرج چمک اور تیز ہوائیں چل سکتی ہیں۔ 5 سے 7 اپریل کے دوران جزوی بادل رہیں گے اور ہلکی بارش کا امکان ہے، جبکہ 8 سے 10 اپریل کے درمیان کئی مقامات پر دوبارہ بارش اور بالائی علاقوں میں برف باری ہو سکتی ہے۔محکمہ موسمیات نے 31 مارچ، 3 اپریل اور 4 اپریل کو دوپہر کے بعد بعض مقامات پر گرج چمک کے ساتھ تیز ہوائیں چلنے کی وارننگ بھی جاری کی ہے۔