عظمیٰ ویب ڈیسک
نئی دہلی// سپریم کورٹ نے جمعہ کو دہلی ایکسائز پالیسی کے سلسلے میں انفورسمنٹ ڈائریکٹوریٹ (ای ڈی) کے ذریعہ درج منی لانڈرنگ کیس میں جیل میں بند دہلی کے وزیر اعلی اروند کیجریوال کو یکم جون تک عبوری ضمانت دے دی۔
ای ڈی نے جمعرات کو دہلی کے وزیر اعلی اروند کیجریوال کو آئندہ لوک سبھا انتخابات کی مہم کے لیے عبوری ضمانت دینے کے سپریم کورٹ کے مشورے کی سختی سے مخالفت کی تھی۔ دہلی ایکسائز پالیسی سے منسلک منی لانڈرنگ کیس میں 21 مارچ کو ای ڈی کے ذریعہ گرفتار ہونے کے بعد کیجریوال فی الحال تہاڑ جیل میں بند ہیں۔
سپریم کورٹ دہلی ایکسائز پالیسی کیس کے سلسلے میں ای ڈی کے ذریعہ ان کی گرفتاری اور ریمانڈ کو چیلنج کرنے والی ان کی درخواست پر سماعت کر رہی تھی۔ دہلی ہائی کورٹ نے قبل ازیں ان کی عرضی کو مسترد کر دیا تھا، جس کی وجہ سے موجودہ اپیل عدالت عظمیٰ کے سامنے ہے۔
7 مئی کو اپیل کی سماعت کے دوران، سپریم کورٹ نے کیجریوال کو عبوری ضمانت دینے کا اشارہ دیا تھا تاکہ وہ آئندہ لوک سبھا انتخابات کے لیے مہم چلا سکیں، تاہم، اُنہوں نے یہ بھی کہا تھا کہ اگر عبوری ضمانت مل جاتی ہے، تو کجریوال کو وزیر اعلیٰ کے طور پر کوئی سرکاری فرائض ادا کرنے کی اجازت نہیں ہوگی۔
کیجریوال کے خلاف ای ڈی کی منی لانڈرنگ کی تحقیقات دہلی کے لیفٹیننٹ گورنر وی کے سکسینہ کی شکایت پر 2022 میں سنٹرل بیورو آف انویسٹی گیشن (سی بی آئی) کے ذریعہ درج کیے گئے ایک کیس سے ہوئی ہے۔ یہ الزام لگایا گیا ہے کہ AAP لیڈروں بشمول کجریوال، سابق نائب وزیر اعلیٰ منیش سسودیا اور دیگر کے ذریعہ ایک مجرمانہ سازش رچی گئی تھی تاکہ 2021-22 کی دہلی ایکسائز پالیسی میں کچھ شراب فروشوں کی حمایت کی جا سکے۔
کیجریوال کو ای ڈی نے 21 مارچ کو گرفتار کیا تھا اور وہ اس وقت تہاڑ جیل میں بند ہیں۔
ای ڈی نے پہلے عرض کیا تھا کہ کجریوال کے ساتھ کسی دوسرے مجرم سے مختلف سلوک نہیں کیا جا سکتا کیونکہ وہ ایک سیاست دان ہیں۔
کیجریوال کے وکیل نے بعد میں جواب دیا کہ اگرچہ کجریوال چیف منسٹر ہونے کے ناطے قانونی چارہ جوئی سے محفوظ نہیں ہیں، لیکن ان کے حقوق کسی دوسرے شخص کے حقوق سے کم نہیں ہیں۔
پہلے کی سماعت کے دوران، سپریم کورٹ نے 2024 کے عام انتخابات سے پہلے کیجریوال کے وقت پر ای ڈی سے سوال کیا تھا۔
