عظمیٰ ویب ڈیسک

سرینگر// لیفٹیننٹ گورنر منوج سنہا نے بارہمولہ پارلیمانی حلقہ میں زیادہ ووٹ ڈالنے پر عوام اور تمام سٹیک ہولڈرز کو مبارکباد دی۔
ایکس پر ایک پوسٹ میں، لیفٹیننٹ گورنر نے کہا، “بارہمولہ پارلیمانی حلقہ میں 58 فیصد سے زیادہ ووٹر ٹرن آوٹ بہت حوصلہ افزا ہے اور یہ جمہوریت پر عوام کے عزم اور اٹل اعتماد کو ظاہر کرتا ہے۔ میں بارہمولہ کے لوگوں کو ہماری جمہوریت کے جشن میں بڑی تعداد میں شامل ہونے پر مبارکباد پیش کرتا ہوں اور شکریہ ادا کرتا ہوں”۔
اُنہوں نے مزید کہا، “میں ووٹنگ کے آزادانہ، منصفانہ، قابل رسائی، جامع اور پرامن انعقاد کو یقینی بنانے کے لیے تمام سٹیک ہولڈرز کی محنت کی تعریف کرتا ہوں۔ نوجوان ووٹروں کو جمہوری اقدار پر اپنے غیر متزلزل یقین کا اظہار کرتے اور جشن مناتے ہوئے دیکھ کر خوشی ہوئی۔ امید ہے کہ یہ مثبت رجحان اگلے مرحلے میں بھی جاری رہے گا”۔