عظمیٰ ویب ڈیسک
سری نگر/جموں و کشمیر میں 77 واں یوم جمہوریہ آج روایتی ملی جوش، حب الوطنی اور قومی وحدت کے جذبے کے ساتھ منایا گیا، جبکہ سری نگر کے تاریخی بخشی اسٹیڈیم میں وادی کی مرکزی تقریب سخت ترین سیکورٹی حصار میں منعقد ہوئی۔
ذرائع کے مطابق بخشی اسٹیڈیم کے اطراف تین سطحی سیکورٹی گرڈ قائم کیا گیا تھا، جس کے تحت تمام داخلی راستوں پر پولیس اور پیرا ملٹری فورسز کے اہلکار مستعد تھے۔ اسٹیڈیم کے ایک کلومیٹر کے دائرے میں اضافی نفری بھی تعینات رہی، تاکہ کسی بھی ناخوشگوار واقعے سے مؤثر انداز میں نمٹا جا سکے۔ صرف اُنہی افراد کو اسٹیڈیم کے اندر داخلے کی اجازت دی گئی جن کے پاس سرکاری دعوت نامے موجود تھے۔
اہم بات یہ رہی کہ سیکورٹی کے سخت انتظامات کے باوجود موبائل فون اور انٹرنیٹ خدمات کو معطل نہیں کیا گیا، جو گزشتہ برسوں سے ہٹ کر ایک مختلف صورتحال تھی—خصوصاً اُن حالات کے مقابلے میں جب 2019 میں آرٹیکل 370 کی منسوخی سے قبل یومِ جمہوریہ اور یومِ آزادی کے موقعوں پر موبائل خدمات اکثر معطل کی جاتی تھیں۔
مرکزی تقریب میں نائب وزیر اعلیٰ سریندر کمار چودھری نے پریڈ کی سلامی لی اور قومی پرچم لہرایا۔ اُن کے ہمراہ سینئر حکومتی افسران، سیکیورٹی اداروں کے سربراہان اور دیگر محکموں کے افسران موجود تھے۔
شدید سردی کے باوجود پولیس، سی آر پی ایف، این سی سی اور مختلف اسکولوں کے طلبہ کے دستوں نے شاندار مارچ پاسٹ پیش کیا۔ پریڈ کے فوراً بعد مختلف اضلاع سے آئے ہوئے فنکاروں نے ثقافتی پروگراموں کے ذریعے کشمیر کی ثقافتی وراثت، بھائی چارے اور ہم آہنگی کا خوبصورت مظاہرہ کیا۔
بخشی اسٹیڈیم جس کی صلاحیت تقریباً 20 ہزار بتائی جاتی ہے، تقریب کے دوران تقریباً مکمل طور پر بھرا ہوا تھا، جبکہ زیادہ تر سرکاری ملازمین اور اسکولوں کے نمائندے تقریب میں شریک نظر آئے۔
اسی دوران وادی بھر کے تمام سرکاری دفاتر، بشمول ڈویژنل کمشنر کشمیر کے دفتر میں بھی قومی پرچم کشائی کی گئی۔
تقریب کے دوران ایک اہم پہلو سابق وزیر اعلیٰ محبوبہ مفتی اور سری نگر سے تعلق رکھنے والے حکمران جماعت نیشنل کانفرنس کے متعدد اراکینِ اسمبلی کی شرکت رہی، جنہوں نے عوام کے ساتھ مل کر قومی پرچم کو سلام پیش کیا۔
مجموعی طور پر یوم جمہوریہ 2026 کی تقریبات امن وامان کے ماحول میں اور سخت حفاظتی انتظامات کے سائے میں بخیر و خوبی مکمل ہوئیں، جبکہ حکومت نے عوام کے تعاون اور سیکورٹی ایجنسیوں کے اقدامات کی تعریف کی۔
جموں و کشمیر میں یوم جمہوریہ کی تقریبات سخت سیکورٹی کے درمیان پُر وقار انداز میں منعقد
ملک و جہان کی خبروں سے رہیں اپڈیٹ
نیوز لیڑ ای میل پر پائیں
