کُولگام میں دم گھٹنے سےنوجوان جاں بحق

عظمیٰ ویب ڈیسک
کُولگام/ضلع کُلگام میں ایک 32 سالہ شخص اس وقت دم گھٹنے کے باعث جاں بحق ہو گیا جب وہ اپنی گاڑی میں ہیٹر آن کر کے سو گیا۔ یہ واقعہ اس وقت پیش آیا جب وہ ضلع ہسپتال کُولگام کے باہر اپنی زیرِ علاج اہلیہ کے انتظارکررہا تھا۔
ایک سرکاری عہدیدار نے بتایا کہ متوفی، جو کُولگام کا رہائشی تھا، نے سردی سے بچنے کے لیے ہسپتال کے قریب اپنی گاڑی کھڑی کی اور رات کے وقت گاڑی کے اندر ہیٹر آن کر کے سو گیا۔
عہدیدار کے مطابق، اس کی اہلیہ ہسپتال میں زیرِ علاج تھی اور بند گاڑی کے اندر ہیٹر کے مسلسل استعمال کے باعث مبینہ طور پر دم گھٹنے کی وجہ سے اس کی حالت بگڑ گئی۔
بعد ازاں اسے گاڑی کے اندر بے ہوش حالت میں پایا گیا اور فوری طور پر ہسپتال منتقل کیا گیا، جہاں ڈاکٹروں نے اسے مردہ قرار دے دیا۔ بعد میں لاش کو میڈیکو لیگل کارروائی کے لیے روانہ کیا گیا۔
متوفی کی شناخت معشوق احمد میر (32) ولد محمد یوسف میر، ساکن کلپورہ، کُولگام کے طور پر کی گئی ہے۔ دریں اثنا پولیس نے واقعے کا نوٹس لیتے ہوئے تحقیقات شروع کر دی ہیں۔