رنجی ٹرافی میں جموں کشمیر کی تاریخی فتح، خطے کے لیے فخر کا لمحہ: بی سی سی آئی

عظمیٰ ویب ڈیسک
سرینگر/بورڈ آف کنٹرول فار کرکٹ اِن انڈیا (بی سی سی آئی) نے جمعرات کو جموں و کشمیر کی رنجی ٹرافی میں تاریخی کامیابی کو خطے کے لیے ایک اہم سنگِ میل قرار دیتے ہوئے ٹیم کو اس شاندار کارنامے پر مبارکباد پیش کی۔بی سی سی آئی نے سوشل میڈیا پلیٹ فارم ایکس پر اپنے بیان میں کہا کہ جموں و کشمیر کی رنجی ٹرافی میں یہ تاریخی فتح خطے میں کرکٹ کے لیے ہمیشہ ایک قابلِ فخر سنگِ میل کے طور پر یاد رکھی جائے گی۔
بیان کے مطابق یادگار کامیابی کے بعد جموں و کشمیر ٹیم کے کھلاڑیوں نے آئی سی سی کے چیئرمین جے شاہ سے ملاقات کی خواہش ظاہر کی تاکہ وہ اس خاص لمحے کو ان کے ساتھ شیئر کر سکیں۔ کھلاڑیوں نے جموں و کشمیر میں کرکٹ کو مضبوط بنانے میں بطور بی سی سی آئی سیکریٹری جے شاہ کی قیادت کے کردار کو بھی سراہا۔
بی سی سی آئی نے ٹیم سے ملاقات کے لیے وقت نکالنے اور کھلاڑیوں کی حوصلہ افزائی کرنے پر جے شاہ کا شکریہ ادا کیا۔کرکٹ بورڈ نے جموں و کشمیر کی پوری ٹیم اور کرکٹ برادری کو اس تاریخی کارنامے پر مبارکباد دیتے ہوئے کہا کہ اس کامیابی کے ساتھ بھارتی ڈومیسٹک کرکٹ کی تاریخ میں ایک نیا اور یادگار باب رقم ہوا ہے۔