عیدالاضحی سے قبل تنخواہوں، پنشن اور واجبات کی عدم ادائیگی پر JKCSF اور JKPUF کا اظہارِ تشویش

عظمیٰ و یب ڈیسک
سرینگر/جموں و کشمیر سول سوسائٹی فورم (JKCSF) اور جموں و کشمیر پنشنرز یونائیٹڈ فرنٹ (JKPUF) نے چیئرمین عبدالقیوم وانی کی قیادت میں عیدالاضحی سے قبل سرکاری ملازمین کی تنخواہوں، سبکدوش ملازمین کی پنشن، عارضی و یومیہ اجرت پر کام کرنے والے ملازمین کی مزدوری اور کنٹریکٹروں کی طویل عرصے سے زیرِ التوا ادائیگیوں کو جاری نہ کیے جانے پر شدید تشویش اور افسوس کا اظہار کیا ہے۔ایک مشترکہ بیان میں تنظیموں نے اس صورتحال کو انتہائی افسوسناک اور غیر حساس قرار دیتے ہوئے کہا کہ جموں و کشمیر میں لاکھوں خاندان عیدالاضحی جیسے مقدس تہوار کی تیاریوں میں مصروف ہیں، مگر ان کے جائز مالی حقوق کی عدم ادائیگی نے انہیں شدید ذہنی اور معاشی پریشانی میں مبتلا کر دیا ہے۔
بیان میں کہا گیا کہ عیدالاضحی صرف ایک تہوار نہیں بلکہ قربانی، ہمدردی، خیرات اور اجتماعی خوشی کا مقدس موقع ہے، اور ایسے وقت میں تنخواہوں و دیگر واجبات میں تاخیر ہزاروں خاندانوں کے لیے مشکلات کا باعث بن رہی ہے۔تنظیموں نے کہا کہ سول سوسائٹی، ملازمین کی انجمنوں، پنشنرز، کنٹریکٹروں اور مختلف سماجی اداروں کی جانب سے بارہا اپیلوں کے باوجود حکومت نے عوامی مسائل کو سنجیدگی سے نہیں لیا۔ انہوں نے کہا کہ اگر حکومت چاہتی تو ماضی کی طرح اس بار بھی عید سے قبل مالی ادائیگیوں کے لیے خصوصی انتظامات کیے جا سکتے تھے۔
بیان میں آنگن واڑی ورکرس، باورچیوں، کنٹنجنٹ ملازمین، ڈیلی ویجرز، آشا ورکرس، آیاز اور دیگر عارضی ملازمین کی ابتر صورتحال کا بھی ذکر کیا گیا، جن کی اجرتیں کئی ماہ سے زیرِ التوا ہیں۔ تنظیموں کے مطابق یہ کم آمدنی والے طبقات عید کے موقع پر بڑھتے اخراجات کے سبب شدید مالی مشکلات کا سامنا کر رہے ہیں۔
جے کے سی ایس ایف اور جے کے پی یو ایف نے مزید کہا کہ کنٹریکٹروں اور چھوٹے تاجروں کی ادائیگیاں رکی رہنے سے مقامی معیشت بھی بری طرح متاثر ہو رہی ہے۔ عوام کی قوتِ خرید میں کمی کے باعث دکانداروں اور کاروباری طبقے کو بھی شدید نقصان اٹھانا پڑ رہا ہے۔تنظیموں نے حکومت کو تنقید کا نشانہ بناتے ہوئے الزام عائد کیا کہ عوامی مسائل کو نظر انداز کرتے ہوئے ارکانِ اسمبلی اور وی آئی پی اداروں کی سہولیات میں اضافہ کیا جا رہا ہے، جبکہ ملازمین، پنشنرز اور عام شہریوں کے جائز حقوق نظر انداز ہو رہے ہیں۔ انہوں نے کہا کہ بروقت تنخواہیں اور واجبات کی ادائیگی کوئی احسان نہیں بلکہ عوام کا بنیادی حق ہے۔
عبدالقیوم وانی نے کہا کہ اگر حکومت عوامی فلاح و بہبود کے تئیں سنجیدہ ہوتی تو بینکوں اور دیگر ادارہ جاتی ذرائع کے ذریعے عارضی مالی انتظامات کر کے عید سے قبل تنخواہیں جاری کی جا سکتی تھیں۔ انہوں نے کہا کہ ایسا نہ کرنا انتظامی بے حسی کو ظاہر کرتا ہے۔تنظیموں نے انتظامیہ سے مطالبہ کیا کہ تمام زیرِ التوا تنخواہیں، پنشن، مزدوروں کی اجرتیں اور کنٹریکٹروں کی ادائیگیاں فوری طور پر جاری کی جائیں تاکہ لوگ عیدالاضحیٰ کو عزت، سکون اور خوشی کے ساتھ منا سکیں۔