شوپیاں میں پولیس کی کارروائی؛ پی ایس اے کے تحت تین او جی ڈبلیوز گرفتار، کوٹ بھلوال جیل جموں منتقل

عظمیٰ ویب ڈیسک
شوپیاں/امن و امان اور سیکورٹی کو برقرار رکھنے کی مسلسل کوششوں کے تحت شوپیاں پولیس نے پبلک سیفٹی ایکٹ (پی ایس اے) کے تحت تین اوور گراؤنڈ ورکرز (OGWs) کو حراست میں لیا ہے۔ گرفتار افراد کی شناخت اویس احمد لون ساکن سیڈو، معشوق احمد شاہ ساکن شاہلاتو اور سبزار احمد گنائی ساکن چیک چولند، ضلع شوپیاں کے طور پر کی گئی ہے۔پولیس کے مطابق مذکورہ افراد بار بار ایسی سرگرمیوں میں ملوث پائے گئے جو ریاست کی سلامتی کے لیے نقصان دہ تھیں۔ ان کے خلاف بھارتیہ ناگرک سرکشا سنہتا (بی این ایس ایس) کی دفعات 170/126 کے تحت احتیاطی کارروائیاں اور قانونی کارروائی عمل میں لائی گئی تھیں، تاہم اس کے باوجود وہ غیر قانونی سرگرمیوں سے باز نہ آئے، جس کے باعث ضلع میں امن و امان کے لیے سنگین خطرہ پیدا ہو گیا تھا۔
ان کی مسلسل مداخلت اور سرگرمیوں کو مدنظر رکھتے ہوئے تمام قانونی تقاضے مکمل کرنے کے بعد ضلع مجسٹریٹ شوپیاں سے حراستی احکامات حاصل کیے گئے۔ بعد ازاں تینوں افراد کو حراست میں لے کر سینٹرل جیل کوٹ بھلوال، جموں منتقل کیا گیا۔شوپیاں پولیس نے ایک بار پھر اس عزم کا اعادہ کیا ہے کہ وہ امن و سلامتی کے تحفظ کے لیے پوری طرح پرعزم ہے اور ریاست کی سلامتی کے خلاف کام کرنے والے عناصر کے خلاف قانون کے مطابق سخت کارروائی جاری رکھے گی۔