لیہہ میں سول ایوی ایشن انفراسٹرکچر کو تقویت، اہم منصوبے کا افتتاح

عظمیٰ ویب ڈیسک
لہیہ/سول ایوی ایشن انفراسٹرکچر کی ترقی کے مقصد سے ایئر فورس اسٹیشن لہیہ میں ایک اہم منصوبے کا افتتاح کیا گیا ۔ اس موقع پر یونین ٹیریٹری لداخ کے لیفٹیننٹ گورنر کویندر گپتا نے منصوبے کا افتتاح کیا، جبکہ مغربی فضائی کمان کے سینئر ایئر اسٹاف آفیسر ایئر مارشل جے ایس مان بھی موجود تھے۔اس افتتاح کو لداخ میں سول ایوی ایشن کے بنیادی ڈھانچے کو مضبوط بنانے کی سمت ایک اہم سنگِ میل قرار دیا جا رہا ہے، جو خطے کی ترقی کے لیے سول انتظامیہ اور دیگر متعلقہ اداروں کے درمیان قریبی تعاون کی عکاسی کرتا ہے۔ یہ انفراسٹرکچر انتہائی دشوار گزار بلند پہاڑی علاقے اور ناموافق موسمی حالات کے باوجود ریکارڈ وقت میں اپ گریڈ کیا گیا ہے۔
اپ گریڈ شدہ سہولیات سے طیاروں کی زمینی نقل و حرکت مزید ہموار ہو گی اور سول پروازوں کی روانگی میں تیزی آئے گی۔ اس سے مسافروں کو بہتر سہولت میسر آئے گی اور طیاروں کے ٹرن اراؤنڈ ٹائم میں کمی واقع ہو گی۔فضائی رابطوں میں بہتری لہیہ سیکٹر میں سیاحت کو فروغ دے گی، جس کے نتیجے میں معاشی مواقع پیدا ہوں گے اور مقامی آبادی کے روزگار کو تقویت ملے گی۔ اس کے ساتھ ساتھ بہتر سہولیات مقامی باشندوں اور سیاحوں دونوں کے لیے قابلِ اعتماد فضائی خدمات کو یقینی بنائیں گی، جبکہ انسانی امداد اور قدرتی آفات سے نمٹنے (HADR) کے لیے خطے کی صلاحیت میں بھی اضافہ ہو گا۔یہ ترقی لداخ کی طویل مدتی سماجی و اقتصادی پیش رفت میں ایک اہم کردار ادا کرے گی۔