غلام علی کھٹانہ نے راجوری – پونچھ خطے میں ریلوے کی ترقی کے لیے وزیر اعظم کا شکریہ ادا کیا

عظمی ویب ڈیسک
سرینگر/بی جے پی کے سینئر رہنما اور نامزد رکن پارلیمنٹ (راجیہ سبھا) انجینئر غلام علی کھٹانہ نے راجوری-پونچھ خطے میں ریلوے لائن بچھانے کے اعلان پر وزیر اعظم نریندر مودی کا تہہ دل سے شکریہ ادا کیا ہے، یہ اطلاع یہاں جاری ایک پریس ریلیزمیں دی گئی،ریلوے حکام کی جانب سے منعقدہ تقریب سے خطاب کرتے ہوئے مسٹر غلام علی کھٹانہ نے کہا کہ یہ اقدام جموں و کشمیر کو تباہی کے دور سے نکال کر خوشحالی کے عہد میں لے جانے کی سمت میں ایک انقلابی قدم ہے۔ انہوں نے اس بات پر زور دیا کہ اس فیصلے سے نوجوانوں، کسانوں، چھوٹے کاروباریوں، ہوٹل کی صنعت اور شاہراہوں و ریلوے سمیت مجموعی بنیادی ڈھانچے کی ترقی کو نمایاں فائدہ پہنچے گا۔
اس تقریب میں مرکزی وزیر برائے ریلوے اور آئی ٹی اشونی ویشنو، جموں و کشمیر کے وزیر اعلیٰ عمر عبداللہ، پی ایم او میں وزیر مملکت جتیندر سنگھ، ایم پی راجیہ سبھا ست شرما، ایم ایل اے جموں جنوبی نریندر سنگھ، ایم ایل اے بہو وکرم رندھاوا اور ایم ایل اے جموں ایسٹ یودھویر سیٹھی سمیت اہم شخصیات نے شرکت کی۔
اس موقع پر جموں اور سری نگر کے درمیان وندے بھارت ایکسپریس کی ایک تاریخی رن کو جھنڈی دکھا کر روانہ کیا گیا، جو علاقائی رابطے میں ایک سنگ میل ہے۔
غلام علی کھٹانہ نے اس بات پر زور دیا کہ ریلوے کی توسیع سے سیاحت اور پھلوں کی صنعتوں کو فروغ ملے گا جب کہ جموں اور کشمیر کے دو اہم خطوں کے درمیان چوبیس گھنٹے رابطے کو یقینی بنایا جائے گا۔ انہوں نے برقی کاری کے ذریعے ریلوے کے بنیادی ڈھانچے کو جدید بنانے، جدید ٹیکنالوجی کو اپنانے، بہتر تعمیراتی معیارات، بہتر حفاظتی اقدامات اور صاف ستھرے ماحول کو فروغ دینے میں اشونی ویشنو کی کوششوں کی بھی تعریف کی۔
اس اقدام کو بڑے پیمانے پر خطے میں اقتصادی ترقی اور طویل مدتی استحکام کی جانب ایک اہم قدم کے طور پر دیکھا جا رہا ہے۔