عظمیٰ ویب ڈیسک
سرینگر/ڈائریکٹر جنرل آف پولیس جموں و کشمیر نالین پربھات نے یومِ جمہوریہ 2026 کی تقریبات کی تیاریوں کے سلسلے میں پی سی آر کشمیر کے کانفرنس ہال میں ایک جامع سیکورٹی جائزہ اجلاس کی صدارت کی۔اجلاس میں جموں و کشمیر پولیس کے سینئر افسران، انٹیلی جنس ایجنسیوں، فوج اور سی اے پی ایف ایز کے اعلیٰ حکام نے شرکت کی۔اجلاس کے آغاز میں شریک افسران نے پولیس سربراہ کو انٹیلی جنس اطلاعات، سیکورٹی اقدامات اور تیاریوں کے منصوبوں سے آگاہ کیا اور وادی کے تمام نامزد مقامات پر سیکورٹی کو مضبوط بنانے، عوامی مقامات کے تحفظ اور تقریبات کے پُرامن انعقاد کے لیے اٹھائے گئے اقدامات کی تفصیل پیش کی۔
اجلاس کے دوران پولیس سربراہ نے مخصوص ذمہ داریاں تفویض کرتے ہوئے ہدایات دیں کہ تمام امور کی درست اور بروقت تکمیل یقینی بنائی جائے۔ زیرِ بحث اہم نکات میں ہجوم کے انتظام، ٹریفک ضابطہ، انٹیلی جنس اطلاعات، فورسز کی حکمتِ عملی کے تحت تعیناتی اور حساس اہداف کا تحفظ شامل تھا۔ انہوں نے فل پروف سیکورٹی انتظامات کی ضرورت پر زور دیتے ہوئے ضلع سربراہان کو سوشل میڈیا کی کڑی نگرانی کی ہدایت دی تاکہ عوامی امن و امان کو متاثر کرنے والی افواہوں اور غلط معلومات کے پھیلاؤ کو روکا جا سکے۔
پربھات نے ملک مخالف عناصر پر نگرانی مزید سخت کرنے اور ایریا ڈومینیشن میں اضافہ کرنے کی ہدایت بھی دی۔ ٹریفک وِنگ کو مؤثر ٹریفک پلان مرتب کرنے کا حکم دیا گیا تاکہ عوام اور محفوظ افراد کی آمد و رفت میں کسی قسم کی رکاوٹ نہ آئے۔ وادی بھر میں شاہراہوں، ضمنی راستوں، ریلوے ٹریکس اور اسٹیشنوں کی سیکورٹی کا بھی جائزہ لیا گیا۔ ایس ایس پی سیکورٹی کشمیر کو مرکزی مقام پر تمام سیکورٹی خدشات کو مدِنظر رکھتے ہوئے سیکورٹی پلان نافذ کرنے کی ہدایت دی گئی۔اجلاس کا اختتام یومِ جمہوریہ کی تقریبات کو پُرامن اور محفوظ بنانے کے عزم کے ساتھ ہوا۔
