عظمیٰ ویب ڈیسک
نئی دہلی/بھارتیہ جنتا پارٹی (بی جے پی) نے جمعہ کے روز پارٹی کے قومی صدر کے انتخاب کا شیڈول جاری کر دیا ہے۔ شیڈول کے مطابق قومی صدر کے عہدے کے لیے نامزدگیاں 19 جنوری کو داخل کی جائیں گی، جبکہ نئے پارٹی سربراہ کے نام کا اعلان 20 جنوری کو کیا جائے گا۔بی جے پی کے قومی ریٹرننگ افسر کے لکشمن کی جانب سے جاری تنظیمی انتخابی شیڈول کے مطابق، قومی صدر کے انتخاب کے لیے نامزدگی کے کاغذات 19 جنوری کو دوپہر 2 بجے سے 4 بجے تک داخل کیے جا سکتے ہیں۔ امیدوار اسی دن شام 5 بجے سے 6 بجے تک اپنے کاغذاتِ نامزدگی واپس لے سکتے ہیں۔
اطلاعات کے مطابق نامزدگی کے کاغذات کی جانچ پڑتال 19 جنوری کو شام 4 بجے سے 5 بجے تک کی جائے گی۔ کے لکشمن، جو کہ بی جے پی کے راجیہ سبھا رکن بھی ہیں، نے بتایا کہ اگر ضرورت پڑی تو 20 جنوری کو ووٹنگ کرائی جائے گی اور اسی دن بی جے پی کے نئے منتخب قومی صدر کے نام کا باضابطہ اعلان کیا جائے گا۔انتخابی عمل مکمل طور پر پارٹی ہیڈکوارٹر میں انجام دیا جائے گا۔
پارٹی ذرائع کے مطابق، بی جے پی کے قومی ورکنگ صدر نتن نبن کے بلا مقابلہ قومی صدر منتخب ہونے کا قوی امکان ہے، کیونکہ کسی دوسرے سینئر رہنما کے انتخابی میدان میں آنے کے امکانات کم ہیں۔نتن نبن کے جے پی نڈا کی جگہ بی جے پی کے نئے صدر بننے کا امکان ہے۔ ذرائع کا کہنا ہے کہ وزیر اعظم نریندر مودی اور مرکزی وزیر داخلہ امت شاہ سمیت پارٹی کی اعلیٰ قیادت نتن نبن کی امیدواری کی حمایت کر رہی ہے۔ (ایجنسیز)
بی جے پی 20 جنوری کو نئے قومی صدر کا اعلان کرے گی، نتن نبن کے بلا مقابلہ منتخب ہونے کا امکان
ملک و جہان کی خبروں سے رہیں اپڈیٹ
نیوز لیڑ ای میل پر پائیں
