بانڈی پورہ میں کھیلوں کے بنیادی ڈھانچے کو فروغ، اسٹیڈیم اپگریڈیشن جاری: حکومت

عظمیٰ ویب ڈیسک
سرینگر/جموں و کشمیر حکومت نے ہفتہ کے روز کہا کہ باندی پورہ اسمبلی حلقہ میں کھیلوں کے بنیادی ڈھانچے کے متعدد منصوبے مکمل کیے جا چکے ہیں، جبکہ شیرِ کشمیر اسپورٹس اسٹیڈیم بانڈی پورہ اور نائدکھائی کے اسپورٹس اسٹیڈیم میں بڑے پیمانے پر اپگریڈیشن کے کام کیپٹل ایکشن پلان 2025-26 کے تحت جاری ہیں۔ایم ایل اے نظام الدین بھٹ کے ایک سوال کے جواب میں محکمہ متعلقہ نے ایوان کو بتایا کہ لنکرگنڈ گنڈپورہ، ہائر سیکنڈری اسکول قاضی پورہ اور گورنمنٹ ہائر سیکنڈری اسکول کالوسہ میں کھیل کے میدان تیار کیے گئے ہیں، جبکہ بی ایم ایس کالوسہ اور گمرو میں بیڈمنٹن کورٹ تعمیر کیے گئے ہیں۔حکومت نے مزید بتایا کہ بانڈی پورہ میں زونل فزیکل ایجوکیشن آفس قائم کیا گیا ہے، جبکہ شیرِ کشمیر اسپورٹس اسٹیڈیم میں اوپن ایئر جم اور پری فیبریکیٹڈ انڈور ہال بھی تیار کیے جا چکے ہیں۔
بیان میں کہا گیا کہ شیرِ کشمیر اسپورٹس اسٹیڈیم میں سینٹر پویلین بلاک کی تعمیر 95 فیصد مکمل ہو چکی ہے۔محکمہ کے مطابق اس کے علاوہ، شیرِ کشمیر اسپورٹس اسٹیڈیم بانڈی پورہ اور نائدکھائی کے اسپورٹس اسٹیڈیم کی اپگریڈیشن کا عمل کیپٹل ایکشن پلان 2025-26 کے تحت جاری ہے۔
منصوبے میں تاخیر کے حوالے سے حکومت نے کہا کہ سینٹر پویلین بلاک کی تکمیل چیف انجینئر نارتھ کشمیر سے نظرثانی شدہ تکنیکی منظوری زیر التوا ہونے کی وجہ سے متاثر ہوئی۔بیان میں کہا گیاتاخیر کی بنیادی وجہ نظرثانی شدہ تکنیکی منظوری کا زیر التوا ہونا ہے۔تاہم، محکمہ نے وضاحت کی کہ شیرِ کشمیر اسپورٹس اسٹیڈیم میں نیا انڈور اسٹیڈیم منظور شدہ الاٹمنٹ کے مطابق مکمل ہو چکا ہے اور استعمال کے لیے تیار ہے۔
اسٹیڈیم میں موجود پرانے اور خستہ حال پویلین ڈھانچے کو ہٹانے کے حوالے سے حکومت نے کہا کہ یہ معاملہ ضلعی انتظامیہ بانڈی پورہ کے ساتھ باضابطہ طور پر اٹھایا گیا ہے۔بیان میں کہا گیاایس کے اسٹیڈیم میں پرانے پویلین کی عمارت کو ہٹانے کی تجویز ضلعی انتظامیہ باندی پورہ کے ساتھ زیر غور ہے۔اگرچہ حکومت نے باقی ماندہ کاموں کی تکمیل کے لیے کوئی حتمی ٹائم لائن نہیں دی، تاہم اس نے کہا کہ طریقہ کار سے متعلق رکاوٹوں کو دور کرنے کی کوششیں جاری ہیں تاکہ منصوبے بروقت مکمل ہوں اور مقامی نوجوانوں کو بہتر کھیل سہولیات فراہم کی جا سکیں۔