عظمیٰ ویب ڈیسک

جموں// جموں خطہ کے کچھ حصوں میں بڑھتی ہوئی عسکری سرگرمیوں کے درمیان فوج کے سربراہ جنرل اوپیندرا دویدی ہفتہ کو جموں و کشمیر میں ایک میٹنگ میں سیکورٹی صورتحال کا جائزہ لینے کے لئے جموں پہنچے۔
30جون کو فوج کے 30ویں سربراہ کا عہدہ سنبھالنے کے بعد تین ہفتوں سے بھی کم عرصے میں آرمی چیف کا جموں کا یہ دوسرا دورہ ہے۔
8 جولائی اور 15 جولائی کو کٹھوعہ کے مچھیڑی اور ڈوڈہ کے دیسہ جنگلات میں دو الگ الگ عسکری حملوں میں ایک کیپٹن سمیت فوج کے 9 اہلکار مارے گئے ہیں۔
حکام نے بتایا کہ آرمی چیف یہاں پولیس ہیڈکوارٹرز میں ایک اعلیٰ سطحی سیکورٹی جائزہ اجلاس کی صدارت کریں گے جس میں پولیس، فوج، نیم فوجی اور انٹیلی جنس کے اعلیٰ افسران شرکت کریں گے۔
ان کا کہنا تھا کہ اجلاس میں دفاع اور وزارت داخلہ کے سینئر افسران کی بھی شرکت کا امکان ہے۔
16 جولائی کو، فوج نے کہا کہ ادھم پور کی شمالی کمان کی تمام تشکیلات جموں و کشمیر میں ملی ٹینسی کو ختم کرنے کے لیے پرعزم ہیں۔
فوج نے کہا کہ وہ سرحد پار سے دراندازی کرنے والے غیر ملکی ملی ٹینٹوں کو ختم کرنے کے لیے جموں کے پولیس کے ساتھ مشترکہ اور مربوط کاروائیوں کا ایک سلسلہ چلا رہی ہے ، جو جموں خطے کے اودھم پور، ڈوڈہ اور کشتواڑ اضلاع کے بالائی علاقوں سے ہوتے ہوئے کشمیر کی طرف بڑھ رہے ہیں۔
اس سے قبل،3 جولائی کو آرمی چیف نے سرحدی ضلع پونچھ کا دورہ کیا اور جموں میں ایک میٹنگ کی صدارت بھی کی اور سیکورٹی صورتحال کا جائزہ لیا۔