’پی اوکے‘جلد بھارت کے ساتھ دوبارہ ضم ہو جائے گا: عمر احمد الیاسی

عظمیٰ ویب ڈیسک
سری نگر/آل انڈیا امام آرگنائزیشن کے چیف امام عمر احمد الیاسی نے جمعہ کے روز کہا ہے کہ پاکستان کے زیرِ انتظام کشمیر (پی اوکے) بہت جلد بھارت کے ساتھ دوبارہ ضم ہو جائے گا۔
انہوں نے سری نگر میں نامہ نگاروں سے بات کرتے ہوئے کہا،’’میں یہاں کشمیر سے اپنے پڑوسی ملک کو ایک بات کہنا چاہتا ہوں کہ پی او کے ، جو بھارت کا اٹوٹ حصہ ہے، یقیناً دوبارہ بھارت کے ساتھ شامل ہوگا کیونکہ وہاں کے لوگ ریفرنڈم چاہتے ہیں۔‘‘الیاسی نے دعویٰ کیا کہ پی او کے عوام بھارت کے ساتھ دوبارہ الحاق کے خواہاں ہیں اور اس کی وجہ جموں و کشمیر میں ہونے والی ترقی اور خوشحالی ہے۔
انہوں نے کہا،ان شاء اللہ ان کی ’گھر واپسی‘ بہت جلد ہوگی۔ یہ وہاں کے لوگوں کی خواہش ہے۔ وہ کشمیر کی ترقی دیکھ کر خوش ہیں۔ آج جس طرح کشمیر ترقی کر رہا ہے، بہت جلد ’’پی او کے ‘‘بھی بھارت کے ساتھ شامل ہو جائے گا۔
چیف امام نے دفعہ 370 کی منسوخی کے بعد کشمیر میں آنے والی تبدیلیوں پر خوشی کا اظہار کرتے ہوئے کہا کہ کشمیر اب ایک ’’نیا کشمیر‘‘بن چکا ہے۔انہوں نے کہا،آج کا کشمیر بہترین بن چکا ہے، ہر طرف خوشحالی ہے اور سیاحت میں اضافہ ہوا ہے۔ یہاں کے لوگ خوشحال ہیں۔ ایک وقت تھا جب یہاں کے نوجوان اور بچے پتھراؤ کرتے تھے، لیکن آج ان کے ہاتھوں میں قلم ہے اور وہ تعلیم حاصل کر رہے ہیں۔
پہلگام کے بائسرن میدان میں گزشتہ سال ہونے والے حملے کا حوالہ دیتے ہوئےالیاسی نے کہا کہ اس واقعے کے بعد سیاحت میں وقتی کمی آئی تھی، تاہم انہوں نے لوگوں سے کشمیر آنے کی اپیل کی۔انہوں نے کہا،میں سب سے کہنا چاہتا ہوں کہ وہ کشمیر آئیں کیونکہ اب یہاں خوف کا کوئی ماحول نہیں ہے۔
مغربی ایشیا میں جاری تنازع پر بات کرتے ہوئے انہوں نے کہا کہ جنگ کسی کے حق میں نہیں ہوتی اور امن کی امید ظاہر کی۔انہوں نے کہا،جنگیں سب کو نقصان پہنچاتی ہیں، یہ تباہی کی علامت ہیں۔ مجھے اپنے ملک کے وزیر اعظم نریندر مودی سے امید ہے کہ وہ ثالثی کریں گے اور ان شاء اللہ جنگ جلد ختم ہوگی اور امن قائم ہوگا۔