رام بن میں لینڈ سلائیڈنگ کے باعث جموں-سرینگر شاہراہ بند، سینکڑوں گاڑیاں درماندہ

عظمیٰ ویب ڈیسک
سرینگر/ جموں-سرینگر قومی شاہراہ جمعرات کو ضلع رام بن میں لینڈ سلائیڈنگ کے باعث بند ہو گئی، سڑک پر بڑے بڑے پتھر گرنے سے دونوں جانب سینکڑوں گاڑیاں پھنس گئیں۔
ایک عہدیدار نے بتایا کہ کرول بریج اور چندرکوٹ کے درمیان بڑے پتھر اور ملبہ گرنے کی وجہ سے شاہراہ مکمل طور پر بند ہے، جس کے باعث ٹریفک کی آمدورفت معطل ہو گئی ہے۔
انہوں نے کہا کہ جموں سے رام بن، بانہال اور سرینگر کی طرف اور اس کے برعکس کسی بھی سمت میں ٹریفک کو اس وقت تک جانے کی اجازت نہیں دی جا رہی جب تک سڑک مکمل طور پر صاف اور محفوظ قرار نہ دی جائے۔
ایس ایس پی ٹریفک نیشنل ہائی وے، راجہ عادل حمید گنائی نے بتایا کہ بڑے پتھر شاہراہ پر گرنے سے ٹریفک کو معطل کرنا پڑا۔
انہوں نے کہا کہ نیشنل ہائی ویز اتھارٹی آف انڈیا (این ایچ اے آئی) نے عملہ اور مشینری تعینات کر دی ہے اور ملبہ ہٹانے کا کام جاری ہے۔
انہوں نے مزید کہا، “شاہراہ کو اسی وقت ٹریفک کے لیے کھولا جائے گا جب ملبہ مکمل طور پر ہٹا کر سڑک کو محفوظ قرار دیا جائے گا۔
ادھر شاہراہ کی بندش کے باعث دونوں اطراف سینکڑوں گاڑیاں اب بھی پھنسی ہوئی ہیں۔