عظمیٰ ویب ڈیسک
نئی دہلی/مرکزی وزیرِ خزانہ نرملا سیتارمن نے اتوار کو یونین بجٹ 2026-27 پیش کرتے ہوئے جموں و کشمیر میں ماحولیاتی طور پر پائیدار پہاڑی ٹریلز کی ترقی کا اعلان کیا۔
پارلیمنٹ میں بجٹ تقریر کے دوران وزیرِ خزانہ نے کہا کہ جموں و کشمیر میں ایسے پہاڑی راستے تیار کیے جائیں گے جو ماحول دوست سیاحت کو فروغ دینے کے ساتھ ساتھ نازک قدرتی نظام کے تحفظ کو بھی یقینی بنائیں گے۔
انہوں نے مزید بتایا کہ اسی طرز کے اقدامات ہماچل پردیش، اتراکھنڈ، مشرقی گھاٹ کے اراکو ویلی اور مغربی گھاٹ میں بھی کیے جائیں گے، تاکہ ماحول دوست سیاحت کو فروغ دیا جا سکے اور قدرتی ماحولیاتی توازن برقرار رہے۔
اس کے علاوہ وزیرِ خزانہ نے اعلان کیا کہ اوڈیشہ، کرناٹک اور کیرالہ میں کچھوؤں کے انڈے دینے کے اہم مقامات پر ’’ٹرٹل ٹریلز‘‘ بھی تیار کیے جائیں گے، جس کا مقصد تحفظِ ماحول کے ساتھ ساتھ پائیدار سیاحت کو فروغ دینا ہے۔
