یومِ جمہوریہ کی پُرامن تقریبات کے لیے کثیر سطحی سکیورٹی انتظامات: آئی جی پی کشمیر

عظمیٰ ویب ڈیسک
سرینگر/ انسپکٹر جنرل آف پولیس، کشمیر وی کے بردی نے جمعہ کو کہا کہ یومِ جمہوریہ کی پُرامن تقریبات کو یقینی بنانے کے لیے وادیٔ کشمیر، بالخصوص سرینگر میں کثیر سطحی سکیورٹی انتظامات کیے گئے ہیں۔
صحافیوں سے گفتگو کرتے ہوئے آئی جی پی بردی نے بتایا کہ جموں و کشمیر پولیس نے نیم فوجی دستوں کے اشتراک سے سکیورٹی گرڈ کو مزید مضبوط کیا ہے تاکہ تقریبات خوش اسلوبی سے منعقد ہو سکیں۔
انہوں نے کہا کہ یہ انتظامات پوری وادی بشمول سرینگر میں نافذ کیے گئے ہیں اور ان کا مقصد شرکاء اور عام شہریوں کی سلامتی کو یقینی بنانا ہے۔
آئی جی پی کے مطابق یومِ جمہوریہ کی مرکزی تقریبات مختلف اضلاع میں منعقد ہوں گی، جہاں تقاریب کے دوران مہمانانِ خصوصی سلامی لیں گے۔
انہوں نے مزید کہا کہ سرینگر میں مرکزی تقریب بخشی اسٹیڈیم میں منعقد ہوگی، جس میں پولیس اہلکار، اسکولی بچے اور عوام پریڈ میں شرکت کریں گے۔
اس سے قبل آج صبح شہر میں واقع بلیدان استمبھ پر عہدیداروں اور شرکاء نے شہداء کو خراجِ عقیدت پیش کیا۔
آئی جی پی بردی نے کہا کہ ایسی تقاریب نہ صرف شہداء کی قربانیوں کو خراجِ تحسین پیش کرتی ہیں بلکہ شرکاء میں نظم و ضبط اور حب الوطنی کے جذبے کو بھی فروغ دیتی ہیں۔