جموں و کشمیر کے بجلی منصوبے دوبارہ پٹری پر، تاخیر کے مسائل حل ہو گئے: منوہر لال کھٹر

عظمیٰ ویب ڈیسک
نئی دہلی/مرکزی وزیرتوانائی منوہر لال کھٹرنے پیر کے روز کہا کہ جموں و کشمیر میں تمام بجلی منصوبے، جن میں کشتواڑ کے بڑے پن بجلی منصوبے بھی شامل ہیں، طے شدہ وقت کے مطابق آگے بڑھ رہے ہیں۔ انہوں نے کہا کہ وہ دیرینہ مسائل جو پہلے ان منصوبوں کی تکمیل میں رکاوٹ بنے ہوئے تھے، اب حل کر لیے گئے ہیں۔کشتواڑ کے اپنے حالیہ دورے کا حوالہ دیتے ہوئے کھٹر نے کہا کہ سندھ طاس معاہدے سے متعلق حالیہ پیش رفت کے بعد یہ اس خطے کا پہلا دورہ تھا جو کسی مرکزی وزیرِ توانائی نے کیا۔ انہوں نے بتایا کہ متعلقہ ایجنسیوں کو واضح اور سخت ہدایات دی گئی ہیں تاکہ تمام منصوبے بغیر کسی مزید تاخیر کے مقررہ مدت میں مکمل کیے جائیں۔اہم پن بجلی منصوبوں کے معائنے کے بارے میں بات کرتے ہوئے، کھٹر نے ریتلے پن بجلی منصوبے، سلال پن بجلی منصوبے (مرحلہ اوّل اور دوم) اور ساولاکوٹ پن بجلی منصوبے کے دوروں کا ذکر کیا۔ انہوں نے کہا کہ ان چاروں بڑے منصوبوں پر کام نے رفتار پکڑ لی ہے اور اب یہ مکمل طور پر درست سمت میں آگے بڑھ رہے ہیں۔
کھٹر نے کہاتمام بجلی منصوبے وقت پر مکمل ہونے چاہئیں۔ یہ منصوبے کئی برسوں سے زیرِ تعمیر تھے اور پہلے مختلف مسائل کا سامنا رہا، لیکن اب وہ تمام مسائل حل کر دیے گئے ہیں۔ ایک ایک کر کے یہ چاروں منصوبے مکمل ہوں گے اور مقررہ وقت کے مطابق بجلی کی پیداوار شروع ہو جائے گی۔مرکزی وزیر نے زور دیا کہ ان منصوبوں کی تکمیل سے جموں و کشمیر کو نمایاں فائدہ پہنچے گا اور ملک کی مجموعی توانائی سلامتی میں بھی اضافہ ہوگا۔
پاکستان کی جانب سے جموں و کشمیر میں بھارت کے پن بجلی منصوبوں پر بار بار اعتراضات کے جواب میں، کھٹر نے انہیں محض بیان بازی قرار دیتے ہوئے کہا کہ اب ایسے بیانات کی کوئی اہمیت نہیں رہی۔انہوں نے کہاپاکستان کے بیانات کا کوئی مطلب نہیں۔ وزیرِ اعظم پہلے ہی واضح کر چکے ہیں کہ مسلسل ملی ٹینسی کے تناظر میں سندھ طاس معاہدے کا جائزہ لیا گیا ہے۔اتوار کے روز، مرکزی وزیر منوہر لال کھٹر نے مختلف منصوبوں کا جائزہ لینے کے لیے کشتواڑ کا دورہ کیا تھا۔ساولاکوٹ پن بجلی منصوبے کے دورے کے دوران انہوں نے کہا کہ یہ منصوبہ، جو نیشنل ہائیڈرو الیکٹرک پاور کارپوریشن (این ایچ پی سی) کے تحت جموں و کشمیر میں تعمیر ہو رہا ہے، 800 میگاواٹ بجلی پیدا کرے گا اور ملک کی بجلی پیدا کرنے کی صلاحیت میں اہم اضافہ کرے گا۔ انہوں نے سلال بجلی منصوبے کا بھی دورہ کیا۔ (ایجنسیز)