بنگلہ دیشی کھلاڑی کو ٹیم میں لینے پر ہندو سنت کی شاہ رخ خان پر تنقید

عظمیٰ ویب ڈیسک
ناگپور/ہندو روحانی پیشوا جگدگرو رام بھدر آچاریہ نے بالی ووڈ سپر اسٹار شاہ رخ خان کو ان کی آئی پی ایل فرنچائز کولکاتا نائٹ رائیڈرز (کے کے آر) کی جانب سے ایک بنگلہ دیشی کرکٹر کو سائن کرنے پر سخت تنقید کا نشانہ بنایا ہے۔ ان کا کہنا ہے کہ ہمسایہ ملک بنگلہ دیش میں ہندوؤں پر ہونے والے مظالم کے تناظر میں یہ فیصلہ قابلِ افسوس ہے۔
جمعرات کو ناگپور میں میڈیا سے گفتگو کرتے ہوئے، جب کے کے آر کی جانب سے آئی پی ایل 2026 کے لیے بنگلہ دیشی فاسٹ بولر مصطفیٰ ظہور رحمان (مستفیض الرحمان) کو سائن کرنے سے متعلق سوال کیا گیا تو رام بھدر آچاریہ نے کہا کہ یہ نہایت بدقسمتی ہے، کیونکہ شاہ رخ خان کا رویہ ہمیشہ ایک غدار جیسا رہا ہے۔
انہوں نے بنگلہ دیش میں اقلیتی ہندوؤں پر حملوں کی مذمت کرتے ہوئے کہا کہ بھارتی حکومت کو ایسے واقعات ہرگز برداشت نہیں کرنے چاہئیں اور اس معاملے پر سخت اور جارحانہ موقف اختیار کرنا چاہیے۔رام بھدر آچاریہ نے مزید کہا کہ بنگلہ دیش کے عوام اور وہاں کی حکومت کو یہ بات سمجھائی جانی چاہیے کہ ان کا ملک ہندوؤں کی مدد سے وجود میں آیا تھا۔