وزیر اعلیٰ عمر عبداللہ کی اہم کابینہ میٹنگ طلب، ریزرویشن پالیسی میں بڑی تبدیلیوں کا امکان

عظمیٰ ویب ڈیسک
جموں/ریزرویشن پالیسی میں متوقع تبدیلیوں کو مدنظر رکھتے ہوئے وزیر اعلیٰ عمر عبداللہ نے 3 دسمبر کو ایک اعلیٰ سطحی کابینہ میٹنگ طلب کی ہے، جس میں سرکاری نوکریوں اور تعلیمی اداروں میں اوپن میرٹ کوٹے میں اضافہ سمیت اہم فیصلے کیے جانے کی توقع ہے۔سرکاری ذرائع کے مطابق یہ میٹنگ صبح 9 بجے سول سیکرٹریٹ جموں میں ہوگی، جو سالانہ دربار موو کے بعد پہلی باقاعدہ کابینہ میٹنگ ہے۔
ذرائع کا کہنا ہے کہ ریزرویشن میں مجوزہ اصلاحات میٹنگ کا اہم حصہ ہوں گی، کیونکہ حکومت RBA اور EWS سمیت کچھ زمروں کے کوٹے میں ردوبدل کرکے اوپن میرٹ شیئر بڑھانے کے لیے ریزرویشن رولز میں ترمیم کرنا چاہتی ہے۔
افسران کے مطابق EWS کوٹا رہنما اصولوں کے تحت زیادہ سے زیادہ 10 فیصد ہے، جس میں مناسب جواز پر تبدیلی ممکن ہے، جبکہ RBA کوٹا جو کبھی 20 فیصد تھا، مؤثر افراد کو غیرمتوازن فائدہ ملنے کی شکایات کے بعد 10 فیصد کر دیا گیا۔ذرائع نے بتایا کہ’’اوپن میرٹ کو 40 فیصد تک بڑھانے کے لیے حکومت کو مختلف زمروں میں سے تقریباً 10 فیصد کم کرنا ہوگا، البتہ وہ زمرے جنہیں پارلیمنٹ نے لازمی قرار دیا ہے، جیسے SC، ST اور OBC، ان میں کمی نہیں کی جائے گی۔
اس وقت جموں و کشمیر میں مجموعی ریزرویشن 70 فیصد ہے، جس میں سب سے زیادہ حصہ 20 فیصد شیڈول ٹرائبز کا ہے (گوجر-بکروال اور پہاڑی قبائل کے لیے 10-10 فیصد)، اس کے بعد RBA اور EWS کے لیے 10-10 فیصد، OBC اور SC کے لیے 8-8 فیصد جبکہ ALC/IB کے لیے 4 فیصد مختص ہیں۔ کابینہ سب کمیٹی برائے ریزرویشن 10 دسمبر 2024 کو عام زمرے کے امیدواروں کے احتجاج کے بعد تشکیل دی گئی تھی۔ اس نے 10 جون 2025 کو اپنی سفارشات پیش کیں جن کا بعد میں قانون محکمے نے جائزہ لیا۔ اب یہ سفارشات کل کی کابینہ میٹنگ میں حتمی منظوری کے لیے پیش ہونے والی ہیں۔ ذرائع کے مطابق تمام فیصلوں کو آخرکار لیفٹیننٹ گورنر کی منظوری درکار ہوگی۔
حال ہی میں فنانس ڈیپارٹمنٹ نے اکاؤنٹس اسسٹنٹس کی 600 اسامیاں مشتہر کیں جن میں سے صرف 240 اوپن میرٹ کے لیے رکھی گئیں۔ اس فیصلے نے عام زمرے کے نوجوانوں میں ناراضگی پیدا کی، جن کا کہنا ہے کہ انہیں سرکاری بھرتیوں میں نظرانداز کیا جا رہا ہے۔قبل ازیں وزیر اعلیٰ عمر عبداللہ نے جمعے کو کہا تھا کہ کابینہ آئندہ میٹنگ میں ریزرویشن کی درجہ بندی کے مسئلے پر غور کرے گی۔ انہوں نے بتایا کہ انتخابی ضابطہ اخلاق کے باعث معاملہ مؤخر تھا، لیکن اب اس پر باضابطہ بحث ہوگی۔