ہندوستان نے پاکستان کو پانچ وکٹوں سے شکست دے کر ایشیا کپ کا خطاب اپنے نام کر لیا

عظمیٰ ویب ڈیسک
دبئی/کلدیپ یادو (چار وکٹ)، ورون چکرورتی، اکشر پٹیل اور جسپریت بمراہ (دو دو وکٹ) کی شاندار گیند بازی کے بعد تلک ورما (ناٹ آؤٹ 69) اور شیوم دوبے (33) کی بہترین اننگز کی بدولت ہندوستان نے اتوار کو ایشیا کپ کے فائنل میچ میں پاکستان کو 5 وکٹوں سے شکست دے کر ایشیا کپ کا خطاب جیت لیا۔
147 رنز کے ہدف کا تعاقب کرنے اتری ہندوستان کی شروعات اچھی نہیں رہی اوراس نے 20 رنز پراپنی تین وکٹیں گنوا دیں۔ ابھیشیک شرما (5)، سوریہ کمار یادو (1)، اور شبمن گل 12 رنز بنا کر آؤٹ ہوئے۔ ایسی نازک صورتحال میں تلک ورما اور سنجو سیمسن کی جوڑی نے اننگ کو سنبھالا اور چوتھے وکٹ کے لیے 57 رنز جوڑے۔ 13ویں اوور میں ابرار احمد نے سنجو سیمسن کو صاحبزادہ فرحان کے ہاتھوں کیچ کروا کر شراکت توڑ دی۔ سیمسن نے 21 گیندوں میں دو چوکے اور ایک چھکا لگا کر 24 رنز بنائے۔ اس کے بعد بلے بازی کرنے آئے شیوم دوبے تلک ورما کے ساتھ مل کر تیزی سے رنز بنائے۔ فہیم اشرف نے 19ویں اوور میں شیوم دوبے کو آؤٹ کیا۔ دوبے نے 22 گیندوں میں دو چوکے اور دو چھکے لگا کر 33 رنز بنائے۔ ہندوستان نے 19.4 اوور میں پانچ وکٹ پر 150 رن بناکر ایشیا کپ پانچ وکٹ سے جیت لیا۔ رنکو سنگھ نے ہندوستان کے لیے وننگ باؤنڈری لگائی۔ تلک ورما نے 53 گیندوں پر چار چھکے اور تین چوکے لگا کر (ناٹ آؤٹ 69) رنوں کی میچ وننگ اننگ کھیلی۔پاکستان کی جانب سے فہیم اشرف کو تین وکٹ ملے۔ شاہین شاہ آفریدی اور ابرار احمد نے ایک ایک بلے باز کو آؤٹ کیا۔
اس سے قبل آج یہاں ہندوستانی کپتان سوریہ کمار یادو نے ٹاس جیت کر پہلے گیند بازی کرنے کا فیصلہ کیا۔ بلے بازی کرنے اتری پاکستان کو صاحبزادہ فرحان اور فخر زمان نے ٹھوس آغاز فراہم کیا۔ دونوں بلے بازوں نے پہلے وکٹ کے لیے 84 رنز جوڑے۔ ایک موقع پر، ایسا لگ رہا تھا کہ پاکستان ایک بڑااسکور کھڑا کرے گا۔ ورون چکرورتی نے 10ویں اوور میں صاحبزادہ فرحان کو آؤٹ کر کے اس شراکت کا خاتمہ کیا۔ فرحان نے 38 گیندوں میں پانچ چوکوں اور تین چھکوں کی مدد سے 57 رنز بنائے۔ اس کے بعد کلدیپ یادو نے 13ویں اوور میں صائم ایوب (14) کو آؤٹ کرکے پویلین بھیج دیا۔ محمد حارث (0) کو اکشر پٹیل نے آؤٹ کیا۔ پاکستان کا چوتھا وکٹ 15ویں اوور میں فخر زمان کی شکل میں گرا۔ انہیں ورون چکرورتی نے کلدیپ یادو کے ہاتھوں کیچ آؤٹ کرایا ۔ فخر زمان نے 35 گیندوں پر دو چوکوں اور دو چھکوں کی مدد سے 46 رنز بنائے۔
اس کے بعد پاکستان کے مڈل آرڈر اور ٹیلنڈرز ہندوستانی باؤلنگ اٹیک کے سامنے یکے بعد دیگرے پویلین لوٹنے لگے۔ 20ویں اوور کی پہلی گیند پر بمراہ نے محمد نواز (6) کو رنکو سنگھ کے ہاتھوں کیچ کراتے ہوئے پاکستان کی اننگ 146 کے اسکور پر ختم کردی۔ آٹھ پاکستانی بلے باز ڈبل فیگر تک بھی نہ پہنچ سکے۔ہندوستان کے لیے کلدیپ یادو نے چار اوور میں 30 رن دے کر چار وکٹیں حاصل کیں۔ اکشر پٹیل، ورون چکرورتی اور جسپریت بمراہ نے دو دو بلے بازوں کو آؤٹ کیا۔