حلقہ انتخاب خانیار کے ’ملک صاحب گوجوارہ ‘کے گلی کوچے خستہ حالی کا شکار، راہگیروں کو شدید مشکلات

عظمیٰ ویب ڈیسک
سرینگر/سرینگر کے قلب میں واقع حلقہ انتخاب خانیار کے معروف محلہ ’’ملک صاحب گوجوارہ‘‘کے گلی کوچے بدترین خستہ حالی کا شکار ہیں، جس کی وجہ سے مقامی آبادی کو روزمرہ آمد و رفت میں شدید مشکلات کا سامنا ہے۔ نہ صرف راہگیر بلکہ اسکولی بچے، بزرگ شہری، خواتین اور مریض بھی متاثر ہو رہے ہیں۔ علاقے کے مکینوں نے متعلقہ حکام کی مسلسل عدم توجہی اور مقامی عوامی نمائندے کی سردمہری پر شدید ناراضگی کا اظہار کیا ہے۔
علاقہ مکینوں کا کہنا ہے کہ ’’ملک صاحب گوجوارہ‘‘کی گلیاں گزشتہ کئی برسوں سے مرمت و تعمیر کی منتظر ہیں، لیکن حکومتی عدم دلچسپی کے باعث یہ علاقہ تباہی کی تصویر بن چکا ہے۔ مقامی شہریوں اشتیاق احمد، اعجاز احمد اور مہراج الدین نے میڈیا سے بات کرتے ہوئے بتایا کہ ’’ہم نے متعدد بار انتظامیہ اور میونسپل حکام سے درخواستیں کیں، یاد دہانیاں کروائیں، لیکن ہر بار صرف وعدے اور یقین دہانیاں ہی ملیں، عملی طور پر کچھ نہیں ہوا۔‘‘
انہوں نے بتایا کہ بارش کی صورت میں یہ گلیاں تالاب میں تبدیل ہو جاتی ہیں، کیچڑ اور پانی کی بھرمار کی وجہ سے بچوں، خواتین اور بزرگوں کا پیدل چلنا محال ہو جاتا ہے۔ بعض مقامات پر تو یہ گلیاں مکمل طور پر شکستہ ہو چکی ہیں، جہاں سے گزرنا نہ صرف دشوار بلکہ خطرناک بھی ہو چکا ہے۔
مقامی لوگوں کے مطابق علاقے کی ایک اہم گلی جو کہ ایک اسکول ’’سین کیڈز‘‘اور میرج ہال کی موجودگی کے باعث ہمیشہ لوگوں کی آمدورفت سے بھری رہتی ہے، اس وقت انتہائی خستہ حالی کا شکار ہے۔ گلی کی حالت اس قدر خراب ہو چکی ہے کہ نہ صرف اسکول جانے والے بچوں کو بلکہ عام راہگیروں کو بھی یہاں سے گزرنا انتہائی مشکل ہو گیا ہے۔ خصوصاً صبح کے وقت جب بزرگ افراد نماز کے لیے مساجد کا رخ کرتے ہیں تو انہیں شدید پریشانیوں کا سامنا کرنا پڑتا ہے۔
لوگوں افسوس کا اظہار کرتے ہوئے کہا کہ جہاں متعلقہ حکام کی عدم توجہی کا شدید گلہ ہے وہیں مقامی ایم ایل اے علی محمد ساگر سے بھی شکوہ ہے کہ قد آور سیاسی رہنمااورحلقہ کے موجودہ ایم ایل اےہونے کے باوجودکے حلقہ کےمیں گلیاں اور نالیاں اِس قدر خستہ حالی کا شکار ہے ۔
مقامی باشندوں کا یہ بھی کہنا تھا کہ گلیوں اور نالیاں کی مرمت کے لیے رقومات پہلے ہی واگزار ہو چکی ہیں، تاہم ٹینڈر عمل میں تاخیر کی وجہ سے کام کا آغاز نہیں ہو سکاجس کی وجہ سے عوام کو مسلسل مشکلات کا سامنا ہے۔
عوام نے زور دے کر کہا ہے کہ ایم ایل اے علی محمد ساگر ذاتی مداخلت کرتے ہوئے متعلقہ حکام کو ’’ملک صاحب گوجوارہ ‘‘ کی تباہ حال گلیوں کی حالت سدھارنے کیلئے فوری اقدمات کی ہدایت دیں تاکہ علاقے کی یہ گلیاں جلد از جلد قابلِ آمد و رفت بن سکیں۔