عظمیٰ نیوزسروس
جموں//خوراک، شہری سپلائیز اور امور صارفین، ٹرانسپورٹ، یوتھ سروسز اور کھیل، سائنس و ٹیکنالوجی اور انفارمیشن ٹیکنالوجی کے وزیر ستیش شرما نےکھوڑ کا ایک وسیع دورہ کیا اور وہاں ایک بڑے اجتماع سے خطاب کیا۔اس تقریب میں زندگی کے مختلف شعبوں سے تعلق رکھنے والے لوگوں کا نمایاں ٹرن آؤٹ دیکھا گیا، جس نے بنیادی ڈھانچے کی ترقی سے لے کر بنیادی سہولیات تک کے مسائل کو اجاگر کیا۔ستیش شرما نے حاضرین کے خدشات کو غور سے سنا اور انہیں یقین دلایا کہ ان کی طرف سے اٹھائے گئے مسائل اور خدشات کو متعلقہ حکام کے ساتھ اٹھایا جائے گا اور ان کا فوری طور پر ازالہ کیا جائے گا۔لوگوں سے خطاب کرتے ہوئے وزیر موصوف نے کہا کہ وہ خطے میں ترقی اور خوشحالی لانے کے لیے انتہائی جوش اور ولولے سے کام کریں گے۔ انہوں نے ترقیاتی اہداف کے حصول میں عوام سے تعاون طلب کیا۔عام لوگوں کو درپیش اہم مسائل کو حل کرنے کے لیے حکومت کی غیر متزلزل عزم پر زور دیتے ہوئے، وزیر نے کہا کہ وزیر اعلیٰ عمر عبداللہ کی قیادت میں، ہم موثر حکمرانی کی فراہمی اور عوامی شکایات کو ترجیحی بنیادوں پر حل کرنے کو یقینی بنانے کے لیے وقف ہیں۔وزیر نے لائن ڈپارٹمنٹس کے افسران سے کہا کہ وہ لوگوں کو فوری خدمات فراہم کرنے میں اپنی مخلصانہ کوششیں کریں۔ انہوں نے انہیں ہدایت کی کہ وہ آپس میں مل کر کام کریں تاکہ لوگوں کو کسی قسم کی تکلیف کا سامنا نہ کرنا پڑے۔اس سے پہلے ستیش شرما نے شری گرو روی داس کی جینتی کے 684 ویں پرکاش اتسو کے سلسلے میں اکھنور میں شوبھا یاترا میں شرکت کی۔وزیر نے اس موقع پر بنی نوع انسان اور خاص طور پر جموں و کشمیر کے لیے امن اور خوشحالی کے لیے دعا کی۔
