عظمیٰ نیوزسروس
جموں//مجرموں کے خلاف سخت کارروائی پرزوردیتے ہوئے، جموں کے ڈپٹی انسپکٹر جنرل آف پولیس شیو کمار شرما نے بدھ کوکہاکہ فائرنگ اور چوری کے بڑھتے ہوئے واقعات کے پس منظر میں جرائم اور بدمعاشوں کے خلاف زیرئو ٹالرنس یعنی صفر رواداری کی پالیسی اپنائی جارہی ہے ۔ ڈسٹرکٹ پولیس لائنزجموں میں افسران کے ایک اعلیٰ سطحی اجلاس کی صدارت کرتے ہوئے ڈی آئی جی نے غنڈوں، منشیات فروشوں، نقب،کارچوروں اور دیگر سماج دشمن عناصر کے خلاف سخت کارروائی کرنے کے لیے خصوصی کوششوں کی ضرورت پر زور دیا۔انہوں نے افسران کو ہدایت کی کہ وہ ایسے مجرموں کی مناسب فہرستیں رکھیں تاکہ ان کی سرگرمیوں پر مناسب نگرانی کی جاسکے۔اجلاس میں تینوں اضلاع کے اعلیٰ افسران نے شرکت کی۔سرکاری اعلامیے کے مطابق میٹنگ کے دوران، ، مختلف انٹیلی جنس معلومات کا اشتراک کیا گیا اور ان طریقوں کے بارے میں بتایا گیا جن کے ذریعے وہ لاجسٹک اور مالی مدد حاصل کر رہے ہیں۔ ڈپٹی انسپکٹر جنرل آف پولیس شیو کمارشرما نے ان کے مالی حلقوں کے نیٹ ورک کو توڑنے، غیر قانونی تجارت کے ذریعے جمع کی گئی جائیدادوں کو ضبط کرنے کی بھی ہدایت دی، جس میں بھتہ خوری، زمینوں پر قبضہ، پراپرٹی ڈیلنگ وغیرہ شامل ہیں۔انہوں نے کہا کہ ان مجرموں کے سپورٹ سسٹم کو نگرانی میں رکھا جانا چاہئے اور ان کے رشتہ داروں اور دوستوں سمیت جو ان کی مدد کرتے ہیں اور انہیں پناہ دیتے ہیں، انہیں قانون کے تحت درج کیا جانا چاہء۔اعلیٰ پولیس اہلکار نے جموں میں چوری، فائرنگ اور ڈکیتی کے حالیہ واقعات کے پیش نظر افسروں پر زور دیا کہ وہ اس لعنت کو ختم کرنے کے لیے مشن پر مبنی نقطہ نظر اختیار کریں۔ڈی آئی جی نے منشیات کی غیر قانونی تجارت میں ملوث نیٹ ورکس کی نشاندہی اور ان کو ختم کرنے کے لیے کوششیں تیز کرنے پر زور دیا۔ شیو کمار شرما نے ملک دشمن عناصر کے عزائم کو ناکام بنانے اور پرامن ماحول کو برقرار رکھنے کے لیے مشکوک افراد پر چوکسی کی اہمیت پر زور دیا۔انہوں نے افسران کو ہدایت دی کہ وہ ان لوگوں کے خلاف قانونی کارروائی کریں جو سوشل میڈیا یا ٹیلی ویڑن، پورٹل اور دیگر میڈیا پلیٹ فارمز کے ذریعے بدمعاشوں اور جرائم پیشہ افراد کی تعریف کر رہے ہیں۔ جموں ٹریول گائیڈڈی آئی جی نے انصاف کے لیے غیر متزلزل عزم کا اظہار کیا اور افسران پر زور دیا کہ وہ مقدمات کو ان کی میرٹ پر حل کرنے کو یقینی بنائیں۔تاہم میٹنگ میں گینگسٹرز کے لیے آپریشن کلین اپ، منشیات کے استعمال سے لڑنے کے لیے آپریشن سنجیوانی، آپریشن پاٹھ شالا، آپریشن کامدھینو، آپریشن اوتار، آپریشن تھرڈ آئی اور آپریشن میگھ دوت سمیت مختلف اقدامات پر بھی تبادلہ خیال کیا گیا۔مزید برآں، تمام افسران کو ہدایت کی گئی کہ وہ اپنے دائرہ اختیار میں تمام ناکوں کو مضبوط کریں اور ان مقامات کی نشاندہی کریں جہاں سیکورٹی گرڈ کو مزید بڑھایا جا سکتا ہے۔تمام افسران کو ہدایات دی گئیں کہ وہ اوور گراؤنڈ ورکرز، ہسٹری شیٹرز اور پریشانیاں پیدا کرنے والوں کی سرگرمیوں پر کڑی نظر رکھیں جبکہ رنگ برنگے شیشوں، اونچی آواز میں میوزک استعمال کرنے اور بغیر نمبر پلیٹ والی گاڑیوں کے خلاف بھرپور مہم چلانے کی ہدایت کی گئی۔انہوں نے یہ بھی ہدایت کی کہ جو بھی غیر قانونی اسلحہ رکھنے اور قبضہ کرنے والوں کے خلاف سخت قانونی کارروائی کی جائے۔
جموں شوٹ آوٹ :جنڈیال قتل کا معمہ حل | کلیدی ملزم سمیت 11ملزمان گرفتار :ایس ایس پی
عظمیٰ نیوزسروس
جموں//جموں کے جیول چوک میں 21جنوری کو سُمت جنڈیال کے قتل کا معمہ حل کرکے پولیس نے گیارہ ملزمان کو حراست میں لینے کا دعویٰ کیا ہے۔ایس ایس پی جموں جوگندر سنگھ نے ایک پرہجوم پریس کانفرنس کے دوران بتایا کہ 21جنوری کو جیول چوک جموں میں نامعلوم افراد نے گاڑی پر فائرنگ کی جس کے نتیجے میں سمت جنڈیال کی برسر موقع ہی موت واقع ہوئی۔انہوں نے کہاکہ پولیس نے کیس درج کرکے قتل کے اس واقعے میں ملوث کلیدی ملزمان سمیت گیارہ افراد کو حراست میں لیا ہے۔ایس ایس پی کے مطابق ہیومن انٹیلی جنس ، سی سی ٹی وی اور ٹیکنیکل صلاحیتوں کو بروئے کار لا کر پولیس نے حملہ آوروں کی شناخت کی اور انہیں گرفتار کرنے کی خاطر ایک خصوصی تحقیقاتی ٹیم کا قیام عمل میں لایا ۔ان کے مطابق پولیس ٹیم نے جموں، پنجاب ، ہریانہ ، دہلی اور اتر پردیش میں چھاپہ مار کارروائیوں کے دوران 30مشتبہ افراد کو دھر دبوچ کر سلاخوں کے پیچھے دھکیل دیا۔پولیس آفیسر نے بتایا کہ تحقیقات کے دوران منکشف ہوا کہ سمت جنڈیال کا قتل پرانی رنجش کا نتیجہ ہے ۔انہوں نے مزید بتایا کہ گاترو گینگ اور سلاتھیہ گینگ کے درمیان اُس وقت آپسی دشمنی پروان چڑھی جب سال 2023میں گاترو گینگ کے ممبر اکشے کمار کا سلاتھیہ گینگ نے قتل کیا ۔ان کے مطابق اکشے کمار کو قتل کرنے کے دوران پولیس اور بد معاشوں کے درمیان جی ایم سی ہسپتال کٹھوعہ کے احاطے میں گولیوں کا تبادلہ ہوا جس دوران سب انسپکٹر دیپک شرما جاں بحق جبکہ جوابی کارروائی میں ایک بد معاش واسو دیو کمار مارا گیا۔ ایس ایس پی کے مطابق واسو دیو کے قتل کا بدلہ لینے کی خاطر وکاس سلاتھیہ نے جنڈیال کو قتل کرنے کا منصوبہ بنایا۔ان کے مطابق ہریش سنگھ عرف بنٹا کو مبینہ طورپر جنڈیال کا قتل کرنے کی خاطر شوٹرس کی خدمات حاصل کرنے کو کہا گیا ۔ایس ایس پی نے پریس کانفرنس کے دوران بتایا کہ شاستری نگر جموں میں کرایہ کے کمرے میں جنڈیال کو قتل کرنے کا منصوبہ بنایا گیا اور اس کے لئے ہتھیار باہر کی ریاست سے لائے گئے۔انہوں نے مزید بتایا کہ قتل کی منصوبہ بندی سے ایک ہفتے قبل ایک لاکھ پانچ ہزار روپیہ میں ایک آلٹو گاڑی خریدی گئی ۔پولیس آفیسر کے مطابق قتل کی اس واردات کو انجام دینے کی خاطر جس کار اور سکوٹر کو استعمال میں لایا گیا انہیں سانبہ میں برآمد کیا گیا۔انہوں نے بتایا کہ جنڈیال قتل کیس کے معمے کو حل کرکے گیار ہ افراد کو حراست میں لیا گیا جبکہ باقی ملزمان کی بھی تلاش جاری ہے۔
