عظمیٰ ویب ڈیسک

نئی دہلی// کانگریس لیڈر راہل گاندھی کل نئی دہلی میں ایک اہم اجلاس کی صدارت کریں گے، جس میں جموں و کشمیر کے کانگریس کے اعلیٰ لیڈران شرکت کریں گے۔ یہ میٹنگ الیکشن کمیشن کے خطے کے دورے کے تناظر میں ہو رہی ہے۔
پارٹی کے اندرونی ذرائع نے بتایا کہ مدعولیڈران میں جموں و کشمیر کے کانگریس صدر وقار رسول وانی، رمن بھلا، طارق حمید قرہ، جی اے میر، پیرزادہ محمد سعید، غلام نبی مونگا، لال سنگھ اور کانگریس پارٹی کے قانونی مشیر اشوک بھان شامل ہیں۔
اندرونی ذرائع نے بتایا کہ راہول گاندھی آئندہ انتخابات اور خطے کی موجودہ صورتحال کے بارے میں جموں و کشمیر کے مقامی رہنماو¿ں سے رائے لیں گے۔ قائدین سے توقع کی جاتی ہے کہ وہ اسمبلی انتخابات سے قبل جموں و کشمیر میں کانگریس پارٹی کو کس طرح مضبوط کرنے کے بارے میں اپنی بصیرت اور تجاویز پیش کریں گے۔
اس میٹنگ کو خطے میں بالخصوص جموں صوبہ میں اپنی موجودگی کو بحال کرنے کی کانگریس پارٹی کی کوششوں میں ایک اہم قدم کے طور پر دیکھا جا رہا ہے۔ پارٹی زمینی صورت حال کا جائزہ لینے اور کھوئی ہوئی زمین کو دوبارہ حاصل کرنے کے لیے حکمت عملی بنانے کی خواہشمند ہے۔
پارٹی کے اندرونی ذرائع نے بتایا کہ ملاقات کے دوران اسمبلی انتخابات کے ممکنہ امیدواروں پر بھی بات چیت کی جائے گی۔