سرسبز سونابے رحم ہاتھوں کی نذر:کبھی تعمیراتی پروجیکٹوں کی بھینٹ چڑھا تو کبھی آگ سے متاثر

سرینگر // وادی کشمیرکے جنگلات میں آگ کی پر اسرار وارداتوں کا سلسلہ متواتر طور جاری ہے ۔آگ کی وارداتوں کے نتیجے میں سر سبز و شاداب درختوں کی کثیر تعداد خاکستر ہوجاتی ہے اور بسا اوقات جنگلات میں جان بوجھ کر آگ لگائی جاتی ہے تاکہ درختوں کی غیر قانونی طور پر کی گئی کٹائی کے نشانات کو مٹایا جاسکے۔ماحولیات کے ماہرین کا یہ بھی کہنا ہے کہ گرمیوں میں جب درجہ حرارت بہت زیادہ ہوتا ہے اور خشک سالی جیسے حالات ہوتے ہیں تو ایک چھوٹی سی چنگاری سے آگ لگ سکتی ہے۔کبھی کبھار آگ قدرتی طور پر سورج کی تپش یا پھر بجلی گرنے سے بھی لگ جاتی ہے۔وادی کے جنگلات کا کس قدر ستیا ناس کیا جارہا ہے اور کس قدر آنے والی نسل کو ماحولیات کے زہر آلود ہونے کے رحم و کرم پر چھوڑا جارہا ہے، اسکا اندازہ  لگانے کیلئے اتنا کافی ہے کہ گذشتہ دس برسوں کے دوران جنگلات میں آگ کے 4600واقعات رونما ہوئے اور سالانہ اوسطاًمجموعی طور پر 1273 ہیکٹر رقبہ کو متاثر ہورہاہے ۔صرف گذشتہ سال ہی شمالی ، جنوبی اور وسطی کشمیر کے جنگلات میں 215 وارداتیں رونما ہوئیں ۔محکمہ کا کہنا ہے کہ آگ کی ایک واردات کے دوران اوسطاً 1سے لیکر 5کنال اراضی پر پھیلی جھاڑیوں اور درختوں کو نقصان پہنچتا ہے۔ حکام نے بتایا کہ 2021میں 26لاکھ کے قریب پودوں کی شجرکاری کرنے کا ہدف مقرر کیا گیاہے ۔ماہرین کا کہنا ہے کہ یہاں حالیہ برسوں میںخوفناک رفتار سے جنگلاتی اراضی ختم ہو رہی ہے۔جنگلات کو سمگلر کاٹ رہے ہیں ، تعمیراتی پروجیکٹوںکے دوران بھی ان کا صفایا ہو رہا ہے اور جو کچھ باقی ہے ،وہ آگ سے تباہ ہورہا ہے۔معلوم رہے کہ اس وقت شمالی، جنوبی اور وسطی کشمیر میں جنگلات 812830ہیکٹرا راضی پر پھیلے ہوئی ہیں۔