عظمیٰ نیوز سروس
جموں//حالیہ پارلیمانی انتخابات میں جموں و کشمیر میں بی جے پی کے گھٹتے ووٹوں کا حوالہ دیتے ہوئے جے کے این سی جموں کے صوبائی صدر رتن لال گپتا نے بی جے پی کی قیادت پر الزام لگایا کہ وہ این سی کے خلاف خطہ کے لوگوں کو گمراہ کر رہی ہے۔جاری ایک بیان میں، این سی لیڈر نے کہا کہ جموں خطہ کے لوگوں نے ہمیشہ نیشنل کانفرنس کی حمایت کی ہے اور حال ہی میں منعقدہ لوک سبھا انتخابات میں پارٹی کے ووٹوں نے ایک بار پھر ثابت کر دیا ہے کہ جموں خطے کے لوگوں کو قیادتوں پر پورا بھروسہ ہے۔ انہوں نے کہا کہ جھوٹے منفی بیانیے کے ذریعے جموں میں ان کی شبیہہ کو خراب کرنے کی کوشش کرنے والے اپنی بنیاد کھو رہے ہیں کیونکہ جموں و کشمیر کے لوگوں نے انہیں اصل آئینہ دکھایا ہے۔ انہوں نے کہا کہ بی جے پی کی بیان بازی کے برعکس حالیہ لوک سبھا انتخابات میں ووٹنگ فیصد نے کسی شک و شبہ سے بالاتر ہوکر ثابت کیا ہے کہ جموں خطہ میں این سی کی مضبوط بنیاد ہے ۔سینئر این سی لیڈر نے کہا کہ بی جے پی قیادت غیر ایجنڈے کے مسائل کی تلاش میں ہے کیونکہ اس کی حکومت کے تحت جموں و کشمیر نے ایک متحرک ریاست سے دو بے اختیار مرکزی زیر انتظام علاقوں میں اپنی بدقسمتی سے تقسیم اور تنزلی دیکھی۔بے روزگاری اور آسمان کو چھوتی ہوئی مہنگائی پر قابو پانے میں بی جے پی کی ناکامی کو اجاگر کرتے ہوئے، این سی کے سینئر کارکن نے کہا کہ بی جے پی اپنی غلط پالیسیوں کی وجہ سے میدان کھو چکی ہے لیکن این سی کا بڑھتا ہوا گراف اس کی مسلسل عوام دوستانہ روش کی وجہ سے ہے۔صوبائی صدر نے ضلع ڈوڈہ میں حالیہ دہشت گردانہ حملوں کی بھی مذمت کی اور سوگوار خاندانوں سے ہمدردی کا اظہار کیا ۔
