عظمیٰ نیوسروس
جموں//ڈائریکٹر زراعت جموں انیل گپتا نے سیڈ ملٹی پلکیشن (ایس ایم) فارم چنورکا دورہ کر کے وہاں جاری ترقیاتی منصوبوں اور کاموں کی پیش رفت کا تفصیلی جائزہ لیا۔ اس موقع پر جوائنٹ ڈائریکٹر زراعت (فارمز/ایس ایل یو بی) امن جیوتی شرما، ڈپٹی ڈائریکٹر زراعت (سنٹرل) سنجیو رائے گپتا، اکاؤنٹس آفیسر ورتی اْپل، فارم منیجر وریندر ڈوگرا اور دیگر افسران بھی ان کے ہمراہ موجود تھے۔دورے کے آغاز پر ڈائریکٹر نے ایک جائزہ میٹنگ کی صدارت کرتے ہوئے فارم میں جاری مختلف منصوبوں کے تحت مالی اخراجات اور حاصل شدہ عملی پیش رفت کا معائنہ کیا۔ فارم منیجر وریندر ڈوگرا نے جاری ترقیاتی کاموں اور بنیادی ڈھانچے کی بہتری سے متعلق اقدامات پر تفصیلی بریفنگ پیش کی۔ڈائریکٹر زراعت نے فارم کے عملے سے بات چیت کے دوران زور دیا کہ محکمانہ فارمز میں بیجوں کی پیداوار بڑھانے کے لئے ہر ممکن کوشش کی جائے تاکہ مقامی موسمی حالات کے مطابق اعلیٰ معیار کے بیج کسانوں کو دستیاب ہو سکیں اور مقررہ معیار پر پورا اتریں۔ انہوں نے ایس ایم فارم چنّور کی ٹیم کی محنت اور زرعی جدت کو فروغ دینے کی کوششوں کو سراہا۔انیل گپتا نے فارم میں مختلف فصلوں کا معائنہ بھی کیا اور گندم کی مختلف اقسام کے فاؤنڈیشن اور سرٹیفائیڈ بیجوں کی پیداوار کے معیار کا جائزہ لیا۔ اس کے علاوہ سرسوں، توریا اور برسیَم جیسی فصلوں کی کاشت، فارم مشینری، نکاسی آب کے نظام اور آبپاشی سہولیات کا بھی معائنہ کیا تاکہ بہتر انتظام اور زیادہ پیداوار کو یقینی بنایا جا سکے۔دورے کے دوران ڈائریکٹر نے عملے، تکنیکی ماہرین، مشینری آپریٹروں اور مزدوروں سے ملاقات کی، ان کے مسائل سنے اور خاص طور پر سروس معاملات سے متعلق شکایات کو متعلقہ حکام کے سامنے جلد اٹھانے کی یقین دہانی کرائی۔ انہوں نے امید ظاہر کی کہ ایسے اقدامات سے زرعی شعبہ مزید مستحکم ہوگا اور کسانوں کو براہ راست فائدہ پہنچے گا۔
