عظمیٰ نیوزسروس
جموں//چیف سیکریٹری اتل ڈلو نے متعلقہ انتظامی سیکریٹریز، ڈویژنل کمشنرز اور ضلعی انتظامیہ کے ساتھ ایک اعلیٰ سطحی اجلاس کی صدارت کی، جس میں جموں و کشمیر کے مرکز کے زیر انتظام علاقے میں ضروری اشیاء کی دستیابی اور تقسیم کا جائزہ لیا گیا۔ یہ اجلاس مغربی ایشیا میں بدلتی ہوئی جغرافیائی و سیاسی صورتحال کے پیش نظر منعقد کیا گیا تاکہ ممکنہ سپلائی چین میں خلل کے خلاف مناسب ذخائر کو یقینی بنایا جا سکے۔اجلاس میں پیش کی گئی تفصیلی معلومات کے مطابق اس وقت مرکز کے زیر انتظام علاقے میں موٹر اسپرٹ (پٹرول)، ہائی اسپیڈ ڈیزل اور ایل پی جی کے ذخائر مستحکم ہیں، جبکہ مزید ذخیرہ راستے میں ہے جو ان ذخائر کو مزید مضبوط بنائے گا۔
چیف سیکریٹری نے ہیلپ لائنز کے ذریعے درج عوامی شکایات اور ان کے ازالے کا بھی جائزہ لیا، جس میں آئل مارکیٹنگ کمپنیوں اور ضلعی انتظامیہ کے کردار پر زور دیا گیا۔ انہوں نے آگاہی مہمات کو تیز کرنے اور ذخیرہ اندوزی، زائد قیمت وصولی اور بلیک مارکیٹنگ کے خلاف سخت معائنہ کرنے کی ہدایت دی، جس میں کھاد اور غذائی اجناس بھی شامل ہیں۔ انہوں نے دونوں ڈویژنز میں تجارتی اور صنعتی شعبوں کو 70 فیصد سپلائی یقینی بنانے اور تمام فعال صارفین کی ای-کے وائی سی جلد مکمل کرنے پر بھی زور دیا۔کمشنر سیکریٹری خوراک، شہری رسدات و امور صارفین، سوربھ بھگت نے بتایا کہ پورے مرکز کے زیر انتظام علاقے میں ہموار سپلائی کو یقینی بنانے کے لیے مناسب اقدامات کیے گئے ہیں، جن میں مہاجرین اور مزدور طبقے کے لیے 5 کلو ایل پی جی سلنڈرز کی دستیابی بھی شامل ہے، اور حکومت ہند کی ہدیات کے مطابق تجارتی و صنعتی اداروں کو 70 فیصد سپلائی کے احکامات جاری کیے گئے ہیں۔آخر میں چیف سیکریٹری نے ضلعی انتظامیہ کو ہدایت دی کہ بین الاقوامی حالات کا بہانہ بنا کر ذخیرہ اندوزی یا زائد قیمت وصولی کو روکنے کے لیے بازار کی سخت نگرانی کی جائے، اور خاص طور پر دور دراز علاقوں میں ایل پی جی اور دیگر ضروری اشیاء کی بلا رکاوٹ فراہمی یقینی بنائی جائے۔ انہوں نے عوام کو یقین دلایا کہ مرکز کے زیر انتظام علاقے میں وافر ذخائر موجود ہیں اور گھبرانے کی کوئی ضرورت نہیں، کیونکہ موجودہ ذخائر اور راستے میں آنے والی سپلائی معمول کی زندگی کو برقرار رکھنے کے لیے کافی ہیں۔
