عظمیٰ نیوز سروس
سرینگر//ٹی سی آئی میکس نے ہفتہ کے روز سرینگر میں ایک کشمیری ورثہ کیلنڈر جاری کیا جس میں وادی کشمیر کے قدرتی مناظر، روایتی دستکاری اور عظیم ولی کامل شیخ العالم حضرت شیخ نورالدین نورانیؒ کے فکری و شعری فلسفے کو یکجا کیا گیا۔ یہ کیلنڈر پورے سال کے دوران کشمیر کی ثقافتی اور جمالیاتی جھلک پیش کرتا ہے۔دیوار پر آویزاں کیے جانے والے اس کیلنڈر کا موضوع کشمیر کے موسمی تغیر، روایتی ہنر مندی اور شیخ العالمؒ کے دیرپا اثرات پر مبنی ہے۔ شیخ العالمؒ چودھویں صدی کے وہ عظیم صوفی شاعر ہیں جن کی تعلیمات اور اشعار آج بھی کشمیری فکری و ثقافتی شعور کا اہم حصہ ہیں۔کیلنڈر کے ہر مہینے میں کشمیری شالوں اور دیگر دستکاری روایات کی تصاویر کے ساتھ شیخ العالمؒ کے منتخب اشعار شامل کیے گئے ہیں، جس سے شاعری کو محض تاریخی حوالہ نہیں بلکہ ایک زندہ ثقافتی اظہار کے طور پر پیش کیا گیا ہے۔کیلنڈر کے ڈیزائن میں کشمیری روایتی نقش و نگار جیسے پیزلی، چنار کے پتے، بادام کے پھول اور شجرِ حیات شامل ہیں، جو کشمیری ٹیکسٹائل اور تزئینی فنون میں عام طور پر دیکھے جاتے ہیں۔کیلنڈر میں کشمیری شال کو ایک نمایاں ثقافتی علامت کے طور پر پیش کیا گیا ہے، جس میں خام پشمینہ ریشے سے لے کر نفیس بنائی کے مراحل کو دکھایا گیا ہے۔ ان مناظر کو شیخ العالمؒ کے ان اشعار کے ساتھ جوڑا گیا ہے جو سادگی، اخلاقیات، محنت اور فطرت کے ساتھ ہم آہنگی کا درس دیتے ہیں۔ٹی سی آئی میکس کے مارکیٹنگ منیجر نثار احمد بٹ نے کہا کہ اس کیلنڈر کا مقصد کشمیر کے فکری اور ہنری ورثے کو ایک جدید بصری انداز میں اجاگر کرنا ہے۔
