ٹنگمرگ میں ریجنل انسٹی چیوٹ ہیلتھ اینڈ فیملی ویلفیئر قائم: بالی بھگت

جموں//صحت و طبی تعلیم کے وزیر بالی بھگت نے قانون ساز اسمبلی میں محمد عباس وانی کی طرف سے پوچھے گئے ایک سوال کے جواب میں کہا کہ حکومت نے دھوبی ون ٹنگمرگ میں ریجنل انسٹی چیوٹ ہیلتھ اینڈ فیملی ویلفیئر قائم کیا ہے تاکہ مختلف پروگراموں کے تحت کام کر رہے ان ڈاکٹروں اور نیم طبی عملے و دیگر ملازمین کو اِن ہاوس تربیت فراہم کی جاسکیں۔وزیر موصوف نے کہا کہ اس ادارے میں اس وقت معقول بنیادی ڈھانچہ موجود ہے اور اس سے نرسنگ کالج کے طور پر ترقی دینے کا فی الحال کوئی منصوبہ نہیں ہے۔انہوں نے حکیم محمد یاسین کے ایک کلب کردہ سوال کا جواب دیتے ہوئے کہا کہ وترہل ، آری گام ، شمس آباد ، ہرد پنزو اور رائیار کے پرائمر ی ہیلتھ سینٹروں میں تشخیصی آلات اور نیم طبی عملے کی کوئی قلت نہیں ہے ۔میاں الطاف احمد ، نیلم لنگے نے اس موقعہ پر ضمنی سوالات پوچھے اور اپنے اپنے حلقوں میں طبی اداروں میں بہتری لانے سے جڑے امور اُجاگر کئے۔