یو این آئی
نئی دہلی/فیفا ورلڈ کپ 2026 کا خطاب جیتنے کے بعد اسپین ایک بار پھر فیفا کی تازہ عالمی درجہ بندی میں پہلے نمبر پر پہنچ گیا ہے ۔ اسپین نے ارجنٹینا کو پیچھے چھوڑ کر دنیا کی نمبر ایک مردوں کی فٹبال ٹیم کا مقام حاصل کر لیا ہے ، جبکہ مشترکہ میزبان میکسیکو مارچ 2022 کے بعد پہلی بار ٹاپ 10 میں واپس آگیا ہے ۔ورلڈ کپ 2026 کے شاندار اختتام کے بعد جاری کی گئی نئی درجہ بندی میں اسپین ایک درجہ ترقی کے ساتھ پہلے نمبر پر پہنچ گیا۔ ”لا روخا” نے اپریل میں کھوئی ہوئی پہلی پوزیشن دوبارہ حاصل کر لی، جبکہ فائنل میں اضافی وقت میں 1-0 سے شکست کھانے والی اور دفاعی چیمپئن ارجنٹینا ایک درجہ تنزلی کے بعد دوسرے نمبر پر چلا گیا۔تازہ رینکنگ کے عرصے میں مجموعی طور پر 105 بین الاقوامی میچ کھیلے گئے ، جن میں سے 104 ورلڈ کپ کے دوران ہوئے ۔ ان نتائج کے باعث ٹاپ 10 میں کئی اہم تبدیلیاں دیکھنے میں آئیں۔برازیل ایک درجہ ترقی کے ساتھ پانچویں اور مراکش بھی ایک درجہ ترقی کے ساتھ چھٹے نمبر پر پہنچ گیا، جبکہ پرتگال دو درجے تنزلی کے بعد ساتویں نمبر پر آگیا۔ پرتگال کو پری کوارٹر فائنل میں بعد میں چیمپئن بننے والی اسپین کے ہاتھوں شکست کا سامنا کرنا پڑا تھا۔کوارٹر فائنل تک رسائی حاصل کرنے والا بیلجیم ایک درجہ ترقی کے ساتھ آٹھویں نمبر پر پہنچ گیا اور اس نے اپنے ہمسایہ نیدرلینڈز کو پیچھے چھوڑ دیا، جو ایک درجہ تنزلی کے بعد نویں نمبر پر آگیا۔ مشترکہ میزبان میکسیکو چار درجے ترقی کے ساتھ دسویں نمبر پر پہنچ گیا اور مارچ 2022 کے بعد پہلی مرتبہ ٹاپ 10 میں شامل ہوا، جبکہ جرمنی دو درجے نیچے جا کر بارہویں نمبر پر آگیا۔فیفا نے کہا کہ تازہ درجہ بندی میں ہونے والی بیشتر تبدیلیاں ورلڈ کپ 2026 میں شریک 48 ٹیموں کی کارکردگی کا براہ راست نتیجہ ہیں اور ٹاپ 90 ٹیموں میں نمایاں رد و بدل دیکھنے میں آیا ہے ۔
شمالی امریکہ میں بہترین کارکردگی دکھانے والی دو دیگر ٹیموں نے بھی نمایاں ترقی کی۔ سوئٹزرلینڈ کوارٹر فائنل تک رسائی کے بعد پانچ درجے ترقی کرکے 15ویں نمبر پر پہنچ گیا، جبکہ ناروے نے 12 درجے کی سب سے بڑی چھلانگ لگاتے ہوئے 19واں مقام حاصل کیا۔ ناروے اگست 2011 کے بعد اپنی بہترین عالمی درجہ بندی تک پہنچا ہے ۔دیگر نمایاں ترقی کرنے والی ٹیموں میں مصر (پانچ درجے ترقی کے ساتھ 24واں)، پیراگوئے (سات درجے ترقی کے ساتھ 34واں)، کانگو ڈی آر (پانچ درجے ترقی کے ساتھ 41واں)، جنوبی افریقہ (چھ درجے ترقی کے ساتھ 54واں) اور گھانا (آٹھ درجے ترقی کے ساتھ 65واں) شامل ہیں۔دوسری جانب ترکی پانچ درجے تنزلی کے بعد 27ویں، جمہوریہ کوریا سات درجے تنزلی کے بعد 32ویں، پاناما 10 درجے تنزلی کے بعد 44ویں اور چیکیا آٹھ درجے تنزلی کے بعد 48ویں نمبر پر آ گئے ، اگرچہ یہ چاروں ٹیمیں بدستور ٹاپ 50 میں شامل ہیں۔اس کے برعکس تیونس 12 درجے تنزلی کے بعد 57ویں اور ازبکستان 10 درجے تنزلی کے بعد 60ویں نمبر پر چلے گئے اور ٹاپ 50 سے باہر ہو گئے ۔ ان کی جگہ چلی (دو درجے ترقی کے ساتھ 49واں) اور پیرو (دو درجے ترقی کے ساتھ 50واں) ٹاپ 50 میں شامل ہو گئے ۔ ان دونوں ٹیموں کی شمولیت کے بعد اب جنوبی امریکہ کی نو ٹیمیں ٹاپ 50 کا حصہ ہیں۔رائل بیلجین فٹبال ایسوسی ایشن (آر بی ایف اے ) نے اعلان کیا کہ بلجیم کی قومی ٹیم کے ہیڈ کوچ روڈی گارسیا جولائی کے آخر میں معاہدہ ختم ہونے کے بعد اس میں توسیع نہیں کریں گے ۔آر بی ایف اے نے کہا کہ فرانسیسی کوچ کا 19 ماہ پر محیط مدت کار کامیاب رہا، جس کا اختتام بیلجیم کی ٹیم کے فیفا ورلڈ کپ کے کوارٹر فائنل تک رسائی کے ساتھ ہوا۔ایسوسی ایشن کے مطابق، ”روڈی گارسیا نے یکم فروری 2025 کو ڈومینیکو ٹیڈیسکو کی جگہ یہ ذمہ داری سنبھالی تھی۔ ان کی تکنیکی قیادت میں بیلجین ریڈ ڈیولز نے یوئیفا نیشنز لیگ کے لیگ اے میں اپنی جگہ برقرار رکھی اور 2026 فیفا ورلڈ کپ کے لیے کوالیفائی کیا۔
