عظمیٰ نیوز سروس
نئی دہلی// جمعرات کی صبح دہلی میں فضائی آلودگی کی صورتحال بدستور انتہائی خراب رہی اگرچہ آلودگی کی سطح میں معمولی بہتری دیکھی گئی۔ سینٹرل پولوشن کنٹرول بورڈ کے مطابق صبح تقریباً 7 بجے ایئر کوالٹی انڈیکس 312 ریکارڈ کیا گیا۔ بدھ کی صبح اے کیو آئی 341 تھا تاہم اس معمولی کمی کے باوجود دارالحکومت کی فضا بہت خراب زمرے میں ہی رہی۔ مسلسل خراب ہوا بچوں بزرگوں اور سانس کے مریضوں کے لیے سنگین صحت مسائل پیدا کر رہی ہے۔قومی دارالحکومت کے کئی علاقوں میں آلودگی کی سطح بہت زیادہ رہی۔ سی پی سی بی کے مطابق آنند وہار میں اے کیو آئی 379 رہا۔ اشوک وہار میں 333۔ وزیرپور میں 336۔ پنجابی باغ میں 338۔ آر کے پورم میں 359۔ باوانا میں 323۔ آئی ٹی او میں 331۔ چاندنی چوک میں 361 اور دوارکا سیکٹر 8 میں 342 درج کیا گیا۔ یہ تمام علاقے انتہائی خراب زمرے میں شامل رہے۔اے کیو آئی کی درجہ بندی کے مطابق 0 سے 50 اچھا۔ 51 سے 100 تسلی بخش۔ 101 سے 200 درمیانہ۔ 201 سے 300 خراب۔ 301 سے 400 انتہائی خراب اور 401 سے 500 شدید شمار کیا جاتا ہے۔فضائی آلودگی کے پیش نظر دہلی حکومت نے بدھ کو فیصلہ کیا کہ جب گریڈیڈ ریسپانس ایکشن پلان کے مرحلہ تین اور مرحلہ چار نافذ ہوں گے تو مجاز پارکنگ مقامات پر پارکنگ فیس دوگنی کر دی جائے گی۔
