عظمیٰ سپورٹس ڈیسک
وشاکھاپٹنم// ہندوستان نے 5 ٹیسٹ میچوں کی سیریز کے دوسرے میچ میں انگلینڈ کو 106 رنز سے شکست دے دی۔ ہندوستانی کرکٹ ٹیم نے وشاکھاپٹنم ٹیسٹ کے چوتھے دن چائے سے قبل انگلینڈ کی دوسری اننگز 292 رنز پر ختم کردی۔ انگلینڈ کو جیت کے لیے 399 رنز کا ہدف ملا تھا۔ اس طرح اسے 106 رنز سے شکست کا منہ دیکھنا پڑا۔ اس جیت کے ساتھ ہی ہندوستان نے سیریز 1-1 سے برابر کر دی۔ انگلینڈ نے حیدرآباد میں کھیلے گئے سیریز کا پہلا ٹیسٹ 28 رنز سے جیتا تھا۔انگلینڈ نے دوسرے ٹیسٹ میچ کے دوسرے سیشن میں 4 وکٹیں گنوا دیں۔ جس میں جسپریت بمراہ نے 2 وکٹیں حاصل کیں۔ مکیش کمار بھی ایک وکٹ لینے میں کامیاب رہے جب کہ شریاس آئر نے بین اسٹوکس کو رن آؤٹ کیا۔ دوسرے سیشن میں ہندوستانی شائقین کے لیے واحد مایوسی یہ تھی کہ روی چندرن اشون 500 ٹیسٹ وکٹوں کے ہندسہ تک نہیں پہنچ سکے۔لنچ کے وقت انگلینڈ کا سکور 42.4 اوورز میں 6 وکٹوں پر 194 رنز تھا۔ ان میں سے 3 وکٹیں اشون کے نام تھیں۔ انہوں نے ٹیسٹ میں 499 وکٹیں حاصل کیں۔ انہیں 500 یا اس سے زیادہ ٹیسٹ وکٹیں لینے والے پہلے ہندوستانی بننے کے لیے صرف ایک وکٹ کی ضرورت تھی، لیکن وہ دوسرے سیشن میں ایک بھی وکٹ نہیں لے سکے۔ اب اسے اس نمبر کو چھونے کے لیے تیسرے ٹیسٹ میچ تک انتظار کرنا پڑے گا۔ تیسرا ٹیسٹ میچ 15 سے 19 فروری تک راجکوٹ کے سوراشٹرا کرکٹ ایسوسی ایشن اسٹیڈیم میں کھیلا جانا ہے۔
