یواین آئی
کابل/حشمت اللہ شاہدی نے افغانستان کی ایک روزہ ٹیم کی کپتانی کے عہدے سے استعفیٰ دے دیا ہے ۔شاہدی نے جنوری 2022 سے لے کر جون 2026 میں ہندستان کے خلاف کھیلی گئی آخری ون ڈے سیریز تک 55 ون ڈے میچوں میں افغان ٹیم کی قیادت کی۔ 31 سالہ شاہدی نے سوشل میڈیا پر ایک بیان کے ذریعے اپنے فیصلے کا اعلان کیا اور کہا کہ یہ عہدہ چھوڑنا ان کا ذاتی فیصلہ تھا۔شاہدی نے کہا، “آج میں پورے احترام اور رضامندی کے ساتھ اعلان کرتا ہوں کہ میں اپنے ذاتی فیصلے سے اپنی ٹیم کی کپتانی کا عہدہ چھوڑ رہا ہوں۔ کپتان کے طور پر یہ ذمہ داری نبھانا میرے لیے انتہائی اعزاز کی بات تھی۔ مجھے فخر ہے کہ میں نے اپنی ٹیم کے ساتھ ایمانداری، اتحاد اور لگن کے ساتھ کام کیا۔”
انہوں نے مزید کہا، “اللہ کے کرم اور حکام، کوچز اور کھلاڑیوں کی کوششوں سے ہم نے کئی فتوحات حاصل کیں، اہم میچ جیتے ، بڑی ٹیموں کو ہرایا اور ٹیم کا نام روشن کیا۔”شاہدی کی کپتانی میں افغانستان نے دو طرفہ سیریز میں بنگلہ دیش کو تین بار، زمبابوے کو دو بار اور جنوبی افریقہ نیز آئرلینڈ کو ایک ایک بار ہرایا۔کپتان کے طور پر شاہدی کے بیٹنگ اعداد و شمار میں ان کی عام کارکردگی کے مقابلے میں زیادہ بڑا فرق نہیں رہا۔ کپتانی سے پہلے ان کی اوسط 32.97 اور اسٹرائیک ریٹ 64.39 تھا، جبکہ کپتانی کے دوران ان اعداد و شمار میں معمولی بہتری کے ساتھ یہ بالترتیب 33.79 اور 70.77 ہو گئے ۔ 96 ون ڈے میچوں میں ان کی واحد سنچری افغانستان کے آخری ون ڈے میں چنئی میں ہندستان کے خلاف بنی، جب انہوں نے 131 گیندوں پر 102 رنز بنائے ۔
