یو این آئی
ہرارے/ٹی-20 عالمی چیمپئن ہندوستان کی ٹیم بدھ سے شروع ہونے والی تین میچوں کی ٹی-20 سیریز میں میزبان زمبابوے کے خلاف نہ صرف اپنی خراب فارم کا سلسلہ توڑنے بلکہ کپتان شریس ایر کی قیادت میں نئے دور کا کامیاب آغاز کرنے کی کوشش کرے گی۔ہندوستان مسلسل سات ٹی-20 بین الاقوامی میچوں میں فتح سے محروم ہے ۔ آئرلینڈ اور انگلینڈ کے خلاف حالیہ سیریز میں شکست کے بعد ٹیم کی جارحانہ حکمت عملی اور قیادت پر سوالات اٹھنے لگے ہیں، جس کے باعث زمبابوے کا یہ دورہ خاص اہمیت اختیار کر گیا ہے ۔تمام نگاہیں کپتان شریس ایر پر ہوں گی، جو بطور ٹی-20 کپتان اپنی پہلی فتح کے متلاشی ہیں۔ اگرچہ وہ بلے سے مسلسل اچھی کارکردگی دکھا رہے ہیں، لیکن نوجوان ٹیم کی قیادت کرتے ہوئے ہندوستان کو دوبارہ کامیابی کی راہ پر لانا ان کے لیے بڑا امتحان ہوگا۔ہندوستان اپنی جارحانہ بلے بازی کی حکمت عملی برقرار رکھنے کا ارادہ رکھتا ہے ۔ اوپنرز ابھیشیک شرما اور 15 سالہ نوجوان ویبھَو سوریہ ونشی سے تیز آغاز کی توقع ہے ، جبکہ ایشان کشن، تلک ورما، رنکو سنگھ اور شیوم دوبے مڈل آرڈر کو مضبوطی فراہم کریں گے ۔گیندبازی میں ماینک یادو، آشوک شرما، یش ٹھاکر، روی بشنوئی اور ہرش دوبے پر مشتمل نیا اٹیک مستقبل کی ٹیم کی بنیاد سمجھا جا رہا ہے ۔
انجری سے واپسی کرنے والے ماینک یادو اور انگلینڈ کے دورے کے بعد دوبارہ اپنی جگہ مضبوط بنانے کے خواہاں روی بشنوئی پر بھی خاص نظر رہے گی۔دوسری جانب سکندر رضا کی قیادت میں زمبابوے حالیہ برسوں میں مضبوط حریف کے طور پر ابھرا ہے ۔ ٹیم نے ٹی-20 ورلڈ کپ میں آسٹریلیا کو شکست دے کر اپنی صلاحیت کا ثبوت دیا تھا اور وہ اپنے ہوم گراؤنڈ پر ہندوستان کو سخت چیلنج دینے کے لیے پُرعزم ہے ۔ماہرین کے مطابق یہ سیریز اس بات کا امتحان بھی ہوگی کہ آیا حالیہ ناکامیوں کے باوجود ہندوستان اپنی جارحانہ کرکٹ برقرار رکھ سکتا ہے یا نہیں۔ ہندوستان کے لیے یہ دورہ نئے میچ ونرز تلاش کرنے ، قیادت کو مستحکم کرنے اور آئندہ ٹی-20 ورلڈ کپ کی تیاریوں کے سلسلے میں نہایت اہم تصور کیا جا رہا ہے ۔ہندوستانی ٹیم: شریس ایر (کپتان)، ویبھَو سوریہ ونشی، تلک ورما، رنکو سنگھ، ابھیشیک شرما، شیوم دوبے ، سوریانش شیڈگے ، ہرش دوبے ، ایشان کشن (وکٹ کیپر)، پربھ سمرن سنگھ (وکٹ کیپر)، پرنس یادو، یش ٹھاکر، ماینک یادو، آشوک شرما، ورون چکرورتی۔زمبابوے کی ٹیم: سکندر رضا (کپتان)، بین کرن، ڈیون مائرز، ملٹن شمبا، برائن بینیٹ، ریان برل، ویسلے مدھیویرے ، بریڈ ایونز، تڈیواناشے مارومانی (وکٹ کیپر)، تفادزوا تسیگا (وکٹ کیپر)، تناکا چیوانگا، ویلنگٹن مساکادزا، بلیسنگ مزاربانی، رچرڈ اینگراوا، نیومین نیامہوری۔
