رام بن میں لینڈ سلائیڈنگ کے باعث سری نگر-جموں قومی شاہراہ ٹریفک کے لیے بند

محمد تسکین
جموں/ مسلسل بارشوں کے باعث رام بن ضلع میں لینڈ سلائیڈنگ ہونے کے بعد پیر کے روز سری نگر-جموں قومی شاہراہ کو ٹریفک کے لیے بند کر دیا گیا ہے، حکام نے بتایا کہ سڑک کی بحالی کا کام جاری ہے۔
ٹریفک پولیس کے مطابق شاہراہ رام بن کے علاقے میں کرول پل اور چندرکوٹ کے درمیان بند ہے، جس کے باعث جموں اور سری نگر کو جوڑنے والی اس اہم شاہراہ پر گاڑیوں کی آمد و رفت معطل ہو گئی ہے۔
ایک عہدیدار نے کہا کہ جموں سے رام بن، بانہال اور سری نگر کی طرف اور اس کے برعکس کسی بھی قسم کی گاڑیوں کی آمد و رفت کی اجازت نہیں دی جائے گی جب تک سڑک مکمل طور پر بحال نہیں ہو جاتی۔”
انہوں نے مزید کہا کہ ملبہ ہٹانے اور ٹریفک کی بحالی کے لیے عملہ اور مشینری تعینات کی گئی ہے، تاہم متاثرہ مقام پر مسلسل پتھر گرنے کے باعث کام میں رکاوٹ پیش آ رہی ہے۔
مسافروں کو مشورہ دیا گیا ہے کہ وہ ہائی وے پر سفر سے گریز کریں اور اگلے احکامات تک اپنے سفر کی منصوبہ بندی اسی کے مطابق کریں۔