عظمیٰ ویب ڈیسک
کشتواڑ/ضلع کشتواڑ کے دچھن جموں کشمیر بینک کی ایک شاخ کو لوٹنے والے ڈاکوؤں کو پکڑنے کے لیے پولیس نے ایک خصوصی ٹیم تشکیل دی ہے۔
پولیس نے بتایا کہ بینک ڈکیتی کی وارداتوں کو روکنے کے لیے ایک خصوصی ٹیم تشکیل دی گئی ہے اور تحقیقات تیز کر دی گئی ہیں۔ انہوں نے کہا کہ سی سی ٹی وی فوٹیج حاصل کر لی گئی ہے اور کچھ ملازمین اور سکیورٹی گارڈز سے پوچھ گچھ کی جا رہی ہے۔
قابل ذکر بات یہ ہے کہ نامعلوم چوروں نے دور افتادہ دچھن علاقے میں جموں و کشمیر بینک کی شاخ سے تقریباً 19.50 لاکھ روپے لوٹ لئے۔ یہ واقعہ پیر کو اس وقت پیش آیا جب بینک بند تھا۔ ڈاکو برانچ تک رسائی حاصل کرنے میں کامیاب ہو گئے بینک سے قریباً بیس لاکھ روپے کی رقم پر ہاتھ صاف کئے۔
پولیس نے مزید کہا کہ سیکورٹی ایجنسیوں کو الرٹ پر رکھا گیا ہےاور مقامی باشندوں سے اپیل کی گئی ہے کہ وہ کسی بھی مشکوک سرگرمی کی اطلاع دیں جو ڈاکوؤں کا سراغ لگانے میں مدد دے سکے۔
