اپوزیشن ڈیلی ویجروں کی ہمدرد نہیں:سکینہ یتو

عظمیٰ ویب ڈیسک
سرینگر/صحت اور تعلیم کی وزیر سکینہ یتو نے ڈیلی ویجروں کے مسئلے پر بی جے پی کے اسمبلی سے واک آئوٹ کو ڈرامہ بازی قرار دیتے ہوئے کہا کہ حکومت ان ملازموں کے مسائل کو حل کرنے کے لئے سنجیدہ ہے۔
انہوں نے کہااگر واقعی بی جے پی کو ڈیلی ویجروں کی ہمدردی ہوتی تو وہ ان کے لئے پیسے لا کر ان کی نوکریوں کو مستقل کرتے۔موصوف وزیر نے ان باتوں کا اظہار منگل کو یہاں نامہ نگاروں کے سوالوں کا جواب دینے کے دوران کیا۔
ڈیلی ویجروں کے مسئلے پر بی جے پی کے اسمبلی سے واک آئوٹ کے بارے میں پوچھے جانے پر انہوں نے کہاگذشتہ دس برسوں سے ان کی یہاں سرکار تھی اور دلی میں 15 برسوں سے بی جے پی کی سرکار ہے اگر یہ واقعی ڈیلی ویجروں کے ہمدرد ہوتے تو ان کے لئے پیسے لا کر ان کی نوکریوں کو مستقل کرتے۔ان کا کہنا تھاوہ ڈراما کرتے ہیں، لیکن لوگ سمجھتے ہیں کہ پچھلے دس برسوں کے دوران ڈیلی ویجروں کے ساتھ کتنا ظلم ہوا۔
سکینہ یتو نے کہاعمر عبداللہ صاحب نے ڈیلی ویجروں کے مسائل کو صحیح قرار دیا ہے اور ان کے مسائل کے حل کے لئے ایک کمیٹی بنائی جو اس کمیٹی کی طرف سے رپورٹ آئے گی اس کو تسلیم کیا جائے گا۔
انہوں نے کہا کہ لگ بھگ دس برسوں کے بعد بجٹ میں جموں وکشمیر کے لوگوں کی آواز سنائی دے رہی ہے اور لوگوں کے نمائندے لوگوں کے مسائل اٹھا رہے ہیں۔ان کا کہنا تھاپہلے جموں وکشمیر کا بجٹ دلی میں پاس ہوتا تھا جہاں جموں وکشمیر کے لوگوں کا کوئی نمائندہ نہیں ہوتا تھا۔